նախընտրելի դարձնելԱխալցիխեի թիվ 3 հայկական հանրային դպրոցի տնօրինությունը ժողովի արդյունքում որոշում է կայացրել Հայոց ցեղասպանության 103-րդ տարելիցին նվիրված միջոցառումներ անցկացնել ինչպես նոր, այնպես էլ հին ձեւաչափով: Այս մասին Akhaltskha.Net-ի խմբագիր Էդուարդ Այվազյանի հետ զրույցում հայտնել է դպրոցի նորանշանակ տնօրեն Սուսաննա Ակոպովան, որը` ըստ ԶԼՄ-ների, դպրոցում հակահայկական տրամադրություններ է ստեղծում:
Տնօրենը նշել է, որ ցեղասպանության թեմայով միջոցառում կանցկացվի ոչ միայն բաց դասի ձեւաչափով, ( նման հայտարարություն վերջինս արել էր մարտի 29-ին նույն լրատվամիջոցի հետ հարցազրույցում), այլեւ դպրոցի դահլիճում՝ բեմի վրա եւ դասարաններում:
Հարցին, թե նրանք արդյոք պատրաստվում են մասնակցել Հայոց ցեղասպանության խաչքար հուշակոթողի մոտ ամեն տարի ապրիլի 24-ին անցկացվող միջոցառումներին, Ակոպովան տվել է դրական պատասխան։
Հիշեցնենք, ավելի վաղ դպրոցի տնօրենն արգելել էր այս տարի Հայոց ցեղասպանությանը նվիրված մասշտաբային միջոցառման անցկացումը՝ ուսուցիչներին հանձնարարելով սահմանափակվել բաց դասերով: Տեղեկություններ կան, որ տնօրենը մանկավարժներին ասել է, թե երեխաները կարիք չունեն հիշելու մեկ դար առաջ տեղի ունեցածը եւ պետք է. «դուրս գան այս տխուր թեմայից»:
Ապրիլի 24-ի միջոցառումների ձևաչափի փոփոխության հետ կապված իր մտահոգությունները հայտնել էր Akhaltskha.net լրատվական կայքի խմբագիր Էդուարդ Այվազյանը: Վերջինս նշել էր, թե այն համոզմունքին է, որ ցեղասպանության հերթական տարելիցի միջոցառումները ճիշտ կլինի նշել նախկինի նման` թե՛ դպրոցում, թե՛ հուշակոթողի մոտ, դատապարտող ելույթներով, ճանաչման պահանջներով, ինչպես եղել է նախորդ բոլոր տարիներին:
