ԱՄՆ նախագահ Դոնալդ Թրամփի ու Հյուսիսային Կորեայի առաջնորդ Կիմ Չեն Ընի հանդիպման օրակարգը չի ներառելու Կորեայի հանրապետությունում ամերիկացի զինվորականների ներկայության հարցը։ Այս մասին Սինգապուրում հայտնել է ԱՄՆ պաշտպանության նախարար  Ջեյմս Մեթիսը, փոխանցում է ՏԱՍՍ-ը։

«Այս հարցը չկա Սինգապուրում հունիսի 12-ին կայանալիք հանդիպման օրակարգում»,- ասել է նա՝ ելույթ ունենալով Ասիական –Խաղաղօվկիանոսյան «Շանգրի-լա երկխոսություն» անվտանգության հարցերով միջազգային համաժողովին։ Ելույթը հեռարձակվում էր   Պենտագոնի կայքում։

Նրա խոսքով՝ այս թեման կարող է քննարկվել միայն Վաշինգթոնի ու Սեուլի կողմից, քանի որ ամերիկացի զինծառայողները գտնվում են թերակղզում ԿՀ հրավերքով ու այդ հարցը «չունի առնչություն բանակցություններին, որոնք ընթանում են ԿԺԴՀ-ի հետ»

Միաժամանակ Մեթիսը նշել է , որ Հարավային Կորեայում ամերիկյան կոնտինգենտի ներկայությունը նշանակում է «ընդունել մարտահրավերը  անվտանգության ոլորտում»։ Եթե դիվանագետներին արդյունքում հաջողվի «վերացնել սպառնալիքը», , ապա ԱՄՆ-ն ու  Հարավային Կորեան, «որպես երկու ինքնիշխան ժողովրդավարական պետություններ» կկարողանան վերադառնալ այդ հարցին, հավելել է նա։

Պենտագոնի ղեկավարը նաեւ շեշտել է, որ ԱՄՆ-ն չի դիտարկում կորեական հարցի լուծման ռազմական տարբերակը։ «Վաշինգթոնի դիրքորոշումը դիվանագիտական ջանքերն են, որոնք ձեռնարկվում են վերջին տարիներին»,- ասել է նա՝ պատասխանելով  թերակղզու խնդիրը ռազմական ճանապարհով լուծելու հնարավորության մասին հարցին։ Մեթիսը շեշտել է, որ «Միացյալ նահանգների նպատակն է Կորեական թերակղզու լիարժեք ու վերահսկելի ապամիջուկայնացումը»։

Թրամփը նախօրեին հայտնել էր, որ Կիմ Չեն Ընի հետ Սինգապուրում իր հանդիպումը այնուամենայնիվ կկայանա։