նախընտրելի դարձնել
Հայ խորհրդարանականները մարտի 2-ին քվեարկել են Հայաստանի օմբուդսմենի պաշտոնում պաշտոնում Կարեն Անդրեասյանի թեկնածության օգտին: Փակ գաղտնի քվեարկությանը մասնակցել են 131 պատգամավորներից 97-ը: Անդրեասյանի օգտին կողմ է քվեարկել 83, դեմ 13 պատգամավոր, մեկ քվեաթերթիկ ճանաչվել է անվավեր:
Անդրեասյանը կառավարող մեծամասնության թեկնածուն է, իսկ «Ժառանգությունն» ու Դաշնակցությունն այլընտրանքային թեկնածու չէին առաջադրել:
Նշենք, որ նախկին օմբուդսմեն Արմեն Հարությունյանը հրաժարական էր ներկայացրել: Նա նշանակվել է ՄԱԿ-ի մարդու իրավունքների հարցերով կոմիսարի ներկայացուցիչ Կենտրոնական Ասիայում:
Ստորեւ ներկայացնում ենք Կարեն Անդրեասյանի կենսագրական տվյալները
Նա 34 տարեկան է, իրավաբանական գիտությունների թեկնածու, ԵՊՀ դոցենտ եւ ՀՀ փաստաբանների պալատի անդամ:
1994-2002 թվականներին Կ. Անդրեասյանը սովորել եւ մասնագիտացել է մի շարք հաստատություններում, այդ թվում` Երեւանի պետական համալսարանի իրավաբանական ֆակուլտետում եւ նույն ֆակուլտետի ասպիրանտուրայում, ԱՄՆ Քալիֆորնիայի նահանգի Բերկլիի Համալսարանում, Մեծ Բրիտանիայի Օքսֆորդի Համալսարանում, Մարդու իրավունքների կանադական կենտրոնում, Նիդերլանդների եվրոպական լրագրության կենտրոնում:
1997-2000 թվականներին աշխատել է մի շարք ՀՀ պետական մարմիններում` Երեւանի քաղաքապետարանում, ՀՀ պաշտպանության նախարարությունում, առաջին ատյանի դատարանում, ինչպես նաեւ դասավանդել է մարդու իրավունքներ եւ վարչական իրավունք թիվ 120 միջնակարգ դպրոցում եւ ՀՀ Ոստիկանության ակադեմիայում:
2001-2007 թվականներին դասավանդել է Երեւանի պետական համալսարանի իրավաբանական ֆակուլտետում:
2001-2003 թվականներին նա համատեղությամբ աշխատել է մի շարք հասարակական կազմակերպություններում, այդ թվում` ՀՀ Իրավաբանների միության անվճար իրավական օգնության կենտրոնում /որպես տնօրեն/, “Քաղաքացիական կրթության ծրագիր» միջազգային կազմակերպությունում /որպես ծրագրի համակարգող/, «Ինտերնյուս» հասարակական կազմակերպությունում /որպես իրավաբան/: Նշված ժամանակաշրջանում նաեւ դասավանդել է մարդու իրավունքներ Աբխազիայում, Հարավային Օսիայում եւ Ղարաբաղում անցկացված լրագրողների համար նախատեսված սեմինարներին:
2003 թվականին նա աշխատել է Մեծ Բրիտանիայի Օքսֆորդի համալսարանի Սոցիոլոգիական եւ իրավական հետազոտությունների կենտրոնում` որպես ավագ գիտաշխատող:
2003-2004 թվականներին որպես միջազգային փորձագետ եւ խորհրդատու` աշխատել է Մեծ Բրիտանիայում գտնվող «Հոդված 19» միջազգային կազմակերպությունում, Հունգարիայում տեղակայված «Բաց Հասարակության իրավական նախաձեռնությունե միջազգային կազմակերպությունում, Բուլղարիայի ՙՏեղեկատվության մատչելիություն՚ կազմակերպությունում:
2005-2008 թվականներին աշխատել է Ամերիկյան իրավաբանների ընկերակցությունում` որպես իրավաբան, հետո գլխավոր իրավաբան, այնուհետեւ փոխտնօրեն:
2006-2007 թվականներին համատեղությամբ աշխատել է որպես ՀՀ Սահմանադրական դատարանի նախագահի խորհրդական:
2008 թվականից մինչ օրս «ԴԻՖԵՆՍ» իրավաբանական ընկերության տնօրենն է:
2007-2010 թվականներին իրականացրել է մի շարք հեռուստատեսային եւ հասարակական նախագծեր, այդ թվում` Եվրոպական լրագրության կենտրոնի հետ համատեղ կազմակերպել է տեղեկատվական իրավունքի եւ հետաքննական լրագրության բուհական մրցույթ լրագրող եւ իրավաբան ուսանողների համար, վարել է «Երկրի թեմա» հաղորդաշարը «Երկիր Մեդիա» հեռուստաընկերությունում, «Իրականում» հաղորդաշարը` «Արմենիա» հեռուստաընկերությունում:
Կարեն Անդրեասյանը շուրջ քսան հրապարակված գիտական հոդվածների, ուսումնական ձեռնարկների եւ այլ աշխատությունների հեղինակ է:
Ամուսնացած է, ունի երկու որդի:
