Թուրքիայում քուրդ բնակչության կողմից նշվող Նովրուզի տոնակատարություններում միջադեպ է տեղի ունեցել քուրդ պատգամավորի եւ թուրք ոստիկանի միջեւ։

Թուրքական Milliyet-ի փոխանցմամբ՝  Վանում Նովրուզի տոնակատարությանը մասնակցելու համար ոստիկանությունը ստուգել է միջոցառման վայր մտնող քաղաքացիներին, նոր թույլ տվել անցնել։  Այդ ընթացքում ոստիկանների շղթային է մոտեցել քրդական «Խաղաղություն եւ ժողովրդավարություն» կուսակցության Վանից ընտրված պատգամավոր Օզդալ Ուչերը, ով թույլ չի տվել, որ ոստիկաններն իրեն խուզարկեն։

Ոստիկանության հետ վիճաբանության ժամանակ քուրդ պատգամավորը վերցրել է ոստիկաններից մեկի գլխարկը եւ հեռացել դեպքի վայրից։

Ավելի ուշ պատգամավորը հետ է ուղարկել ոստիկանի գլխարկը։ Ոստիկանն իր հերթին դիմել է դատախազություն:

Նշենք, որ Նովրուզի տոնակատարության ընթացքում մեկ այլ միջադեպ էր տեղի ունեցել Շրնաք նահանգի Սիլոպի շրջանում, որտեղ ոստիկանությունը ջրցան մեքենաներով եւ արցունքաբեր գազով ցրել էր քուրդ բնակչության անօրինական երթը։ Հավաքվածների մեջ է եղել քուրդ կին պատգամավոր Սաբահաթ Թունջելը, ով մոտեցել է գործողությունները ղեկավարող ոստիկանապետին եւ ապտակել նրան։

Ոստիկանապետը ավելի ուշ հայտնել է, թե դատական հայց է ներկայացնելու պատգամավորի դեմ։