Կլիմայաբանները թերագնահատել են գլոբալ ջերմացման ազդեցությունը Եվրոպայի վրա։ Տաք օրերի թիվն այստեղ եռապատկվել է ընդամենը 70 տարում։ Շոգի ալիքները արդեն լուջ սպառնալիք են մարդկանց առողջության համար, տեղեկացնում է HighTech+ը։

Այս տարվա հուլիսը ամենաշոգն է եղել դիտարկումների պատմության ողջ ընթացքում։ Օրինակ, Եվրոպայում սահմանվել է ջերմաստիճանային նոր ռեկորդ՝ օդը Ֆրանսիայի հարավում տաքացել է մինչեւ 46 աստիճան։ Եվ հետո էլ ավելի վատ է լինելու. համաձայն նոր հետազոտության՝ եվրոպական մայրցամաքը տաքանում է այնքան արագ, որ դա չի տեղավորվում գոյություն ունեցող կլիմայական մոդելի մեջ։

Ամերիկյան երկրաֆիզիկական միության թիմն ուսումնասիրել է եղանակի մասին տվյալները, որոնք հավաքել են եվրոպական օդերեւութաբանական կայանները 1950-2018 թվականներին։ Այնուհետեւ գիտնականներն այդ զանգվածից առանձնացրել են տեղեկություն ամենաշոգ եւ ամենասառը օրերի մասին եւ վերլուծել, թե ինչպես են դրանք բաշխվում ժամանակի մեջ։

1950-ից Եվրոպայում եռապատկվել է ծայրահեղ շոգ օրերի թիվը, ամենաշոգ օրերին ջերմաստիճանը բարձրացել է 2,3 աստիճանով։ Ռեկորդային սառը օրերի թիվը նվազել է առնվազն երկու անգամ։ Հասկանալի է՝ ե՛ւ ամառը, ե՛ւ ձմեռը միջինն ավելի տաք են դարձել։

Գիտնականների խոսքով՝ Եվրոպան շատ ավելի արագ է տաքանում, քան կանխատեսում են կլիմայական մոդելները։ Օրինակ, Նիդեռլանդներում, Բելգիայում եւ Ֆրանսիայում նկատվող միտումները մոտ երկու անգամ ավելի ինտեսնիվ են կանխատեսվողից։

Ապագայում  շոգ օրերի քանակը եւ հաճախականությունը լրացուցիչ կաճեն։ Եվրոպացիների համար դա կդառնա լուրջ փորձություն, չէ՞ որ ծայրահեղ բարձր ջերմաստիճանները կարող են հանգեցնել ջրազրկման եւ ջերմային հարվածի։

Հնարավոր է՝ եվրոպական կլիման մի փոքր մեղմելուն կօգնի Գոլֆսթրիմի դանդաղումը։ Որոշ տվյալներով՝ այդ ջերմային հոսանքի արագությունը աստիճանաբար նվազում է գլոբալ ջերմացման պատճառով, ինչը կարող է եղանակը Եվրոպայում ավելի սառեցնել։ Իսկ թե երբ դա տեղի կունենա՝ գիտնականներն առայժմ ասել չեն կարող։