Երգիչ Հայկ Ստվերը ՀՀ վարչապետ Նիկոլ Փաշինյանից երգի ստեղծման առաջարկ է ստացել իր վերջին բանաստեղծության հիման վրա։ Այս մասին երգիչը գրել էր իր ֆեյսբուքյան էջում, ապա ջնջել էր գրառումը։

NEWS.am-ի հետ զրույցում ասաց, որ «ջնջել է գրառումը չափից ավելի ակտիվության պատճառով»:

Հարցին՝ անձամբ վարչապետն է առաջարկե՞լ, թե՞ նախաձեռնությունն իրենն էր, երգիչն ասաց․ «Ինքն է առաջարկել»։

Երգիչը նաև ասաց, որ եթե երգում փոփոխություններ չլինեն, մեկ շաբաթից պատրաստ կլինի, սակայն հավելեց, որ շտկումներ միշտ լինում են։

Հիշեցնենք, որ  Նիկոլ Փաշինյանն՝ ապրիլի 5-ի կայանալիք Սահմանադրական բարեփոխումների հանրաքվեի մասին բանաստեղծություն է գրել ֆեյսբուքյան իր էջում։

«Այս բանաստեղծությունը նվիրում եմ Հայաստանի Հանրապետության հպարտ Քաղաքացու՝ ապրիլի 5-ի հաղթանակին:

Հանրաքվե

Հեղափոխությանը ասում եմ Այո,

Ետ ճամփա չունի դեպի գաղջ անցյալ՝

Իր վաղվա օրվան ժպիտով նայող,

Ժողովուրդը բորբ, հպարտ, միացյալ:

Արդարությանը ասում եմ Այո,

Ոչ մի հրոսակ որ չխուսափի,

Հանցանքին արժան պատասխան տալու

Եւ հատուցելու ահեղ սարսափից:

Ազատությանը Այո եմ ասում,

Իմ ձեռքերով եմ նվաճել քանզի,

Երկար տարիներ դավերով բազում,

Ինձանից խլված արժեքն այդ հազիվ:

Այո եմ ասում Նոր Հայաստանին,

Երջանիկ, հզոր, ինքնիշխան, ազատ:

Եւ ժողովրդիս՝ ասում ընտանիք,

Եւ հայրենիքիս՝ օջախ հարազատ:

Հեղափոխությանը ասում եմ Այո,

Ետ ճամփա չունի դեպի գաղջ անցյալ,

Իր ապագային ժպիտով նայող,

Ժողովուրդը բորբ, հպարտ, միացյալ»: