Նախընտրելի
Շփման գծում Ադրբեջանի ապօրինի գործողությունները ցանկացած դեպքում ստանալու են համարժեք պատասխան, NEWS.am-ի թղթակցի հետ զրույցում հայտնել է Հանրապետական կուսակցության խմբակցության ղեկավար Գալուստ Սահակյանը` մեկնաբանելով Բաքվի կողմից հրադադարի ռեժիմի խախտման դեպքերը:
Գալուստ Սահակյանը նկատել է, որ, ըստ էության, պատերազմը ղարաբաղյան հակամարտության գոտում դեռ շարունակվում է:
Նշենք, որ Լեռնային Ղարաբաղի պաշտպանության բանակը ապրիլի 29-ին 2 հայ զինծառայողների մահվան եւ մեկի վիրավորման կապակցությամբ հայտարարություն էր տարածել.
«Վերջին շրջանում Ադրբեջանի զինված ուժերի կողմից շփման գծի ողջ երկարությամբ ծավալած նախահարձակ գործողությունները, որոնք հիմնականում իրականացվում են դիպուկահար զինատեսակներից, մեկ անգամ ևս փաստում են այն իրողությունը, որ պաշտոնական Բաքուն ոչ միայն չի կատարում միջազգային տարբեր մակարդակներում տեղի ունեցած բանակցություններում ձեռք բերված հրադադարի ռեժիմի պահպանման պահանջները, այլև առավել լկտի ու սանձարձակ բնույթ է հաղորդել իր ագրեսիվ ձեռնարկումներին:
Մասնավորապես, երեկ ղարաբաղաադրբեջանական հակամարտ զորքերի շփման գծում հակառակորդի կողմից արձակված գնդակից ՊԲ ժամկետային զինծառայող Վազգեն Բախշյանի զոհվելու դեպքից հետո, այսօր` ապրիլի 29-ին ողջ օրվա ընթացքում ադրբեջանական բանակի առաջապահ ուժերը, հիմնականում դիպուկահարներ, ինտենսիվ կերպով շարունակել են գնդակոծել ՊԲ դիրքերը, որի հետևանքով զոհվել է երկու զինծառայող, մեկը` վիրավորվել (բոլոր զինծառայողները զորակոչվել են ԼՂՀ մարտունու շրջզինկոմիսարիատից):
ԼՂՀ ՊԲ ողջ անձնակազմը խորապես ցավակցում է զոհված զինծառայողների հարազատներին»:
