Նախընտրելի
Ազգային անվտանգության ծառայությունում քննվող քրեական գործով մեղադրանք է առաջադրվել Ազգային ժողովի ԲՀԿ-ական նախկին պատգամավոր Աբրահամ Մանուկյանին: Այս մասին NEWS.am-ի հարցին ի պատասխան՝ հայտնեց Գլխավոր դատախազի խորհրդական Գոռ Աբրահամյանը։
Նա նշեց, որ նախաքննական մարմնի կողմից միջնորդություն է ներկայացվել դատարան՝ նրա նկատմամբ կալանավորումը որպես խափանման միջոց ընտրելու վերաբերյալ: Միջնորդությունը դեռեւս չի քննվել:
Նշենք, որ մեղադրանքն առաջադրվել է ՀՀ ՔՕ 38-154.2 հոդվածի 2-րդ մասով (կուսակցություններից կամ թեկնածուներից որեւէ մեկի օգտին կողմ կամ դեմ քվեարկելու կամ ընտրություններին մասնակցելուց հրաժարվելու կամ մեկից ավելի անգամ քվեարկելու համար ընտրողին անձամբ կամ միջնորդի միջոցով կաշառք տալուն օժանդակելը):
Ավելի վաղ մեր տեղեկություններով հայտնել էինք, որ Աբրահամ Մանուկյանը ձերբակալվել էր և միջնորդություն էր ներկայացվել դատարան՝ Մանուկյանին կալանավորելու համար։
Երեկ արդեն մամուլում շրջանառվող լուրերի համաձայն՝ Աբրահամ Մանուկյանի ձերբակալման իրավաչափության հարցը դատարանը քննել էր եւ այն ճանաչել ոչ իրավաչափ: Աբրահամ Մանուկյանն ազատ էր արձակել:
