նախընտրելի դարձնել
Օդի աղտոտվածությունը կարող է ինը տարով կրճատել հնդիկների կյանքի տեւողությունը, ասվում է ամերիկյան հետազոտական խմբի զեկույցում, հաղորդել է BBC-ն:
Հետազոտության համաձայն՝ Հնդկաստանի հյուսիսում 480 միլիոն մարդ բախվում է «աշխարհում օդի աղտոտվածության ամենածայրահեղ մակարդակի հետ», եւ այդ բարձր մակարդակները ժամանակի ընթացքում տարածվել են երկրի այլ մասերում:
Նշվում է, որ մաքուր օդի վերաբերյալ կոշտ քաղաքականությունը կարող է երկարացնել մարդկանց կյանքը մինչեւ հինգ տարի:
Հնդկական քաղաքները կանոնավոր կերպով գլխավորում են աղտոտվածության վարկանիշը, եւ վատ օդի պատճառով տարեկան ավելի քան մեկ միլիոն մարդ է մահանում:
Չիկագոյի համալսարանի էներգետիկ քաղաքականության ինստիտուտի (EPIC) զեկույցում ասվում է, որ Հնդկաստանի հյուսիսը շնչում է «աղտոտվածության մակարդակի պայմաններում, որը 10 անգամ ավելի վատ է, քան աշխարհի ցանկացած այլ վայրում»:
EPIC-ի՝ օդի որակի ինդեքսի զեկույցի նոր տվյալները վկայում են, որ մայրաքաղաք Դելիի բնակիչները 10 տարով երկար կապրեին, եթե օդի աղտոտվածության մակարդակը նվազեր Առողջապահության համաշխարհային կազմակերպության (ԱՀԿ) 10 մկգ/մ³ հրահանգին համապատասխան:
2019 թվականին Հնդկաստանում կոշտ մասնիկների միջին կոնցենտրացիան 70,3 մկգ/մ³ էր՝ ամենաբարձրն աշխարհում:
Զեկույցում ասվում է, որ Բանգլադեշը, Հնդկաստանը, Նեպալը եւ Պակիստանը, որոնք միասին կազմում են աշխարհի բնակչության գրեթե քառորդը, մշտապես դասվում են աշխարհի հինգ ամենաաղտոտված երկրների շարքին:
