նախընտրելի դարձնելՎրաստանի ղեկավարությունը որոշել է նոր խթան հաղորդել զբոսաշրջության զարգացմանը երկրի սեւծովյան ափի շրջաններում եւ, հատկապես, Աջարիայի Ինքնավար Հանրապետությունում: Փորձ է արվում բարելավել տեղական բնակչության օտար լեզուների իմացության մակարդակը, եւ դրանում մեծ դեր է վերապահվել աջարական «Ajaratv» հեռուստաընկերությունը:
Այդ նպատակի համար դեպի Արեւմուտք եւ, մասնավորապես, ԱՄՆ կողմնորշված Վրաստանը, սակայն, դիմում է խորհրդային փորձին:
Հետխորհրդային երկրների միջին եւ ավագ սերունդը շատ լավ է հիշում միութենական բոլոր հանրապետությունների հեռուստալիքներով հեռարձակվող ռուսերենի դասընթացների մասին: Ահա այդ փորձն էլ որոշել է օգտագործել ՆԱՏՕ-ին անդամակցել ցանկացող Վրաստանը:
Միայն թե սովորեցնում են ոչ թե ռուսերեն, այլ անգլերեն: Բայց հեռուստադիտողներն ու զբոսաշրջիները դեռ չէին հասցրել յուրացնել անգլերենի դասերը, երբ եթերից սկսեցին թուրքերեն սովորեցնել:
Պետք է նշել, որ այս ամենն այդքան արտառոց չէր լինի, եթե մի քանի «բայցեր» չլինեին:
Նախ` այն, որ վերջին տասնամյակների ընթացքում Աջարիայի բնակիչները բավականին հեռացել են իսլամիզմից, բնակչության մեծ մասը քրիստոնեություն է ընդունել, մահմեդական աջարացիները թիվը նվազել է մինչեւ 30 տոկսի: Վրաստանում Միխայիլ Սահակաշվիլիի իշխանության գալուց եւ Աջարիայում նրա կողմից վերահսկողության ռեժիմի սահմանումից հետո «մահմեդական կիսալուսինն» անհետացել է ինքնավարության բոլոր խորհրդանիշների վրայից: Համենայն դեպս, երկրում որոշել են թուրքերեն սովորեցնել հենց աջարացիներին: Ի դեպ, չնայած Թուրքիայի հետ ընդհանուր սահմանին, թուրք զբոսաշրջիկների հոսք Բաթում եւ Քոբուլեթի չի նկատվում:
Երկրորդ «բայցը» վերաբերում է նրան, որ Բաթումի եւ Քոբուլեթիի լողափերում հիմնականում հանգստանում են հայաստանցի զբոսաշրջիկները: Եւ նորություն չէ, որ հայերի եւ վրացիների միջեւ շփման լեզուն ռուսերենն է. ընդ որում, երկու կողմից էլ անգլերենին անցնելու նախադրյալներ չեն նկատվում, իսկ թուրքերենի մասին խոսելն ավելորդ է: Բայց ստացվում է, որ Աջարիայում զբոսաշրջության զարգացման մասին հայտարարած Վրաստանի իշխանություններին չի հետաքրքրում, թե ինչ լեզվով են շփվում հիմնական զբոսաշրջիկները: Ու փոխանակ երիտասարդ աջարների համար ռուսերենի դասընթացներ կազմկերպելուն, նրանց գլուխը փորձում են անգլերեն եւ թուրքերեն մտցնել: Այս ամենը լավագույն դեպքում անտրամաբանական է եւ ոչ պրակտիկ, թեեւ բացատրվում է հարեւան երկրի ղեկավարության աշխարհաքաղաքական կուրսով:
