նախընտրելի դարձնել
Խոշոր բուսակեր դինոզավրերի անհետացումը, հակառակ ավելի վաղ տեսությունների, չի խանգարել խոշոր պտուղներով ծառերի էվոլյուցիային, պարզել են Լայպցիգի համալսարանի գիտնականները։ Այս մասին նրանք պատմել են Proceedings of the Royal Society B: Biological Sciences ամսագրում հրապարակված հոդվածում։
Հետազոտողները վերլուծել են բրածո եւ մեր օրերում գոյություն ունեցող արմավենու ծառերը: Գենետիկական վերլուծությունը հնարավորություն է տվել հետեւել հազարամյակների ընթացքում տեղի ունեցած փոփոխություններին: Արդյունքները հաստատել են ավելի վաղ արված ենթադրությունը, որ դինոզավրերի ժամանակաշրջանում արմավենիների շատ տեսակներ մեծ պտուղներ ունեին, իսկ բները եւ տերեւները ծածկված էին փշերով:
Ընդ որում, փոքր պտուղներով արմավենու նոր տեսակների առաջացման արագությունը դինոզավրերի անհետացումից հետո նվազել է, մինչդեռ խոշոր պտուղներով տեսակների էվոլյուցիայի տեմպերը գրեթե անփոփոխ են մնացել: Այսպիսով, մեծ պտուղներով արմավենիները գոյություն ունեին նույնիսկ դինոզավրերի անհետացումից հետո. ըստ երեւույթին, փոքր կենդանիները նույնպես կարողանում էին հասնել պտուղներին եւ տարածել սերմերը:
«Մենք կարողացանք հերքել նախկին գիտական ենթադրությունը, որ արմավենու խոշոր պտուղների առկայությունը կախված է բացառապես խոշոր բուսակերներից: Ուստի մենք ենթադրում ենք, որ խոշոր բուսակերների ազդեցության բացակայությունը հանգեցրել է ավելի խիտ բուսական ծածկույթի առաջացմանը, որում ավելի մեծ սերմերով եւ պտուղներով բույսերն էվոլյուցիոն առավելություն ունեին»,- նշել են աշխատանքի հեղինակները:
Գիտնականները հույս ունեն, որ պարզելը, թե ինչպես է խոտակեր դինոզավրերի անհետացումը ազդել բույսերի էվոլյուցիայի վրա, կարող է օգնել կանխատեսել ապագա շրջակա միջավայրի փոփոխությունները: Այժմ խոշոր բուսակերների անհետացումը շարունակվում է մարդու ազդեցության պատճառով, եւ հնարավոր փոփոխությունների մասին տվյալները թույլ կտան պատկերացնել, թե ինչով կարող է դա հղի լինել բույսերի համար:
