Նախընտրելի
Աղքատ ընտանիքներից սկսնակ հետախույզներին հնարավորություն է տրվում միանալ արկտիկական արշավախմբին, որը կփոխի նրանց կյանքը, հաղորդում է BBC-ն:
«Վճռական արշավախումբը» Եվրոպայի ամենամեծ եռակայմ SV Linden նավով կմեկնի Պլիմութից հունիսին: Նավում կլինեն 10 հոգի, որոնք ընտրված կլինեն Մեծ Բրիտանիայի քաղաքային բնակավայրերից:
Բեւեռախույզ Ջիմ ՄաքՆիլը, որը ղեկավարում էր արշավախումբը, ասել է․ «Սա պարտքը վերադարձնելու իմ ձեւն է»։
Նա մեծացել է Հյուսիսային Լոնդոնի Բարնեթ քաղաքում գտնվող կալվածքում եւ ասել է, որ ցանկանում է «բոլոր խավերից» մարդկանց խրախուսել ինչ-որ դրական բան անել կլիմայի փոփոխության հետ կապված:
Արշավախումբը Պլիմութից կանցնի 10 000 ծովային մղոն դեպի Կանադայի բարձր արկտիկական շրջաններ՝ օվկիանոսն ուսումնասիրելու համար:
ՄաքՆիլի խոսքով՝ հանգստյան օրերին կընտրվի 10 անդամ: «Ոմանք կարող են գործազուրկ լինել, մյուսները արձակուրդում են, ոմանք էլ թոշակառու են»,- հավելել է նա:
Նա ասել է, որ արշավախմբի համար նախկին որեւէ փորձ չի պահանջվում, «քանի որ այն հմտությունները, որոնք նրանք ձեռք կբերեն, կյանքի հմտություններն են»:
ՄաքՆիլն ասել է, որ 10 մարդ կընտրվի մինչեւ փետրվարի վերջը եւ կմիանա փորձագետներին ու անձնակազմի անդամներին ճանապարհորդության տարբեր փուլերում: «Սա ամենեւին էլ արկածային արձակուրդ չէ կամ նման այլ բան: Երբեմն շատ դժվար կլինի, հոգնեցուցիչ, բայց աներեւակայելի օգտակար, երբ նրանք տեսնեն Գրենլանդիայի եւ Կանադայի ափերը»:
Սպասվում է, որ նավը Պլիմութ կվերադառնա հոկտեմբերի 24-ին:
