Ուրանի գներն աննշան բարձրացան անցած շաբաթ Նիգերում ռազմական հեղաշրջումից հետո, քանի որ աշխարհում ռադիոակտիվ մետաղի յոթերորդ խոշորագույն արտադրողի հանքարդյունաբերական աշխատանքները շարունակվում էին, սակայն UxC խորհրդատվական ընկերությունը հայտարարել է, որ գները կարող են աճել առաջիկա շաբաթներին, տեղեկացնում է Reuters-ը:

Միջուկային էներգիայի և քաղցկեղի բուժման համար լայնորեն օգտագործվող ուրանի գինը երկուշաբթի նախորդ շաբաթվա 56,15 դոլարից բարձրացել է մինչև 56,25 դոլարի մեկ ֆունտի դիմաց, երեքշաբթի հայտնել է UxC հետազոտական ​​ընկերությունը։

Վերջին երեք տարիների ընթացքում ուրանի գինը կրկնապատկվել է, սակայն զգալիորեն իջել է 2007 թվականի 140 դոլարի գագաթնակետից:

Ֆրանսիական միջուկային վառելիքի արտադրության  Orano ընկերությունը, որը Նիգերում շահագործում է ուրանի հանքերը, անցյալ շաբաթ հայտնել է, որ չնայած պետական ​​հեղաշրջմանը իր գործունեությունը շարունակվում է:

Երեքշաբթի Օրանոն կրկնել է, որ օպերատիվ գործունեությունը շարունակվում է, չնայած իր քաղաքացիներին տարհանելու Ֆրանսիայի ծրագրերին՝ տեղեկացնելով, որ երկրում իր աշխատողների  99%-ը Նիգերիայի քաղաքացիներ են:

Սփոթ գինը հիմնականում մնացել է անփոփոխ նաև այն պատճառով, որ Orano-ն ուրան է վաճառում երկարաժամկետ պայմանագրերով, իսկ ամառային ամիսները դանդաղ են անցնում սփոթ շուկայում, ասել է UxC-ի նախագահ Ջոնաթան Հինզեն:

«Այսպիսի իրադարձության համար կարող է մի փոքր ավելի երկար ժամանակ պահանջվի շուկայի հոգեբանություն ներթափանցելու համար:  Միանգամայն հնարավոր է, որ առաջիկա օրերին և շաբաթներին մենք  ավելի լուրջ ազդեցությունների ականատես դառնանք,- ասել է  նա Reuters-ին:- Ամեն ինչ վկայում է, որ սա կատալիզատոր կծառայի ուրանի  գների բարձրացման համար՝ հաշվի առնելով ներկա պահին ուրանի պահանջարկի և  առաջարկի ընդհանուր խիստ հավասարակշռությունը»:

Եվրամիության միջուկային «Եվրատոմ» գործակալությունը երեքշաբթի հայտարարել է, որ անմիջական վտանգ չի տեսնում Եվրոպայում միջուկային էներգիայի արտադրության համար, եթե Նիգերը կրճատի ուրանի մատակարարումները, քանի որ բլոկի կոմունալ ձեռնարկությունները բավականաչափ պաշարներ ունեն, որոնք կբավարարեն երեք տարի:

Եվրատոմի տվյալներով, անցյալ տարի Նիգերը եղել է ԵՄ բնական ուրանի երկրորդ մատակարարը։

Երկուշաբթի Նիգերում իշխանությունը զավթած խունտան ձերբակալել էր բարձրաստիճան քաղաքական գործիչների, այդ թվում՝ հանքարդյունաբերության նախարարին, ի հեճուկս ժողովրդավարական իշխանությունը վերականգնելու միջազգային կոչերի: