Բելգիայի դատարանն ուրբաթ օրը հինգ տղամարդու դատապարտել է 20 տարվա եւ ցմահ բանտարկությունների՝ ահաբեկչության մեղադրանքով, կապված 2016թ. մահապարտ ահաբեկիչների պայթյունների հետ, որոնց հետեւանքով զոհվել է 32 մարդ, հարյուրավոր մարդիկ վիրավորվել են Բրյուսելի օդանավակայանում եւ մետրոյի մարդաշատ կայարանում, ինչը խաղաղ ժամանակաշրջանում ամենամահասփյուռ հարձակումն է երկրում, տեղեկացրել է The Associated Press-ը։

Գլխավոր կասկածյալ Սալահ Աբդեսլամը մինչ այդ դատապարտվել էր 20 տարվա ազատազրկման փոխհրաձգությանը մասնակցելու համար 2016թ. մարտի 22-ի ահաբեկչություններից առաջ եւ այլեւս բանտարկություն չի ստացել։

Աբդեսլամը ցմահ բանտարկությունն անցկացնում է Ֆրանսիայում՝ առանց ժամկետից շուտ ազատման իրավունքի, Փարիզի սրճարաններում, «Բատակլան» թատրոնում եւ Ֆրանսիայի ազգային մարզադաշտում 2015թ. հարձակումների համար։ Ահաբեկչությունները թե՛ Փարիզում, թե՛ Բրյուսելում կապված էին «Իսլամական պետության» նույն ցանցի հետ։

Ընդհանուր առմամբ 10 մեղադրյալ է ընդգրկված Բելգիայի պատմության մեջ ամենախոշոր դատավարությունում։ Երկու մեղադրյալներից, որոնք եղբայրներ են, բոլոր մեղադրանքները հանվել են։ Մնացած ութը դատապարտվել են ահաբեկչական խմբում իրենց գործունեության համար, նրանցից վեցը դատապարտվել են նաեւ ահաբեկչական սպանության համար։