նախընտրելի դարձնել«Էրեբունի» պատմահնագիտական արգելոց-թանգարանը, հոկտեմբերի 19-ին, ընդունել է Երեւանի միջազգային դպրոցի հայ եւ տարբեր ազգություններ ներկայացնող 6-7 տարեկան 16 սաների, որոնց ծնողներն աշխատում են Հայաստանում հավատարմագրված դիվանագիտական ներկայացուցչություններում եւ արտասահմանյան ձեռնարկություններում:
Այցի նպատակն էր պեղածո նյութերի հիման վրա նպաստել նախանադարյան հասարակության եւ նախամարդու մասին առաջին գիտելիքների յուրացմանը, ինչպես նաեւ ծանոթանալ Երեւանի բնօրրանին` Էրեբունի ամրոցին: Ընդառաջելով դպրոցի տնօրինությանը եւ կարեւորելով հնագիտական ժառանգության մանկավարժությունը վաղ դպրոցական տարիքից` արգելոց-թանգարանը հատուկ այս տարիքի երեխաների համար պատրաստել էր պարզեցված բացատրական էքսկուրսիա, որը տեւել է նախատեսվածից երկար. փոքրիկները մեծ հետաքրքրություն են դրսեւորել հատկապես սեպագիր արձանագրությունների նկատմամբ եւ անընդմեջ հարցրել` թե ինչու են ուրարտացիները թղթի վրա գրելու փոխարել նախընտրել քարը: Նրանց հետաքրքրել է նաեւ, թե որտեղ են պատրաստվել այդքան մեծ տարողության կարասներ, իսկ դիտելով որմնանկարները անհոգ հայտարարել են, թե իրենք էլ են ուրարտացիների նման նկարազարդում իրենց բնակարանների պատերը:
Փոքրիկ այցելուներին, սակայն, չի զարմացրել աճյունասափորների մասին բացատրությունը. նրանցից շատերը տեղյակ են եղել դիակիզման ծեսին:
Թանգարանից հետո, բարձրանալով Էրեբունի ամրոցի միջնաբերդ, հետաքրքրասեր այցելուները նախ զարմացել են` տեսնելով իրենց առջեւ բացվող Երեւանի համայնապատկերը: Այնուհետեւ լսելով, թե ինչպես է ամրոցը լույս աշխարհ եկել հողի շերտերից մաքրվելուց հետո` նրանք չեն զլացել գործի անցնել եւ, առանց կաշկանդվելու, փորձել են տարածքում առկա փոքրիկ քարակտորների օգնությամբ «պեղումներ ձեռնարկել»` նոր քաղաք բացահայտելու ակնկալիքով` ինչին արագորեն միջամտել են արգելոց-թանգարանի աշխատակիցը եւ ուղեկցող ուսուցիչները:
