Նախընտրելի
ՀՀ կառավարությունը կֆինանսավորի դատարանի նշանակած փաստաբանների աշխատավարձի 15 տոկոսով բարձրացումը։ Այս մասին Ազգային ժողովում, «Փաստաբանության մասին» օրենքում փոփոխություններ եւ լրացումներ կատարելու մասին օրինագծի քննարկման ժամանակ, հոկտեմբերի 24-ին ասել է արդարադատության փոխնախարար Լեւոն Բալյանը։
Միջոցները կհատկացվեն պետբյուջեից, միայն արտաժամյա աշխատանքի փոխհատուցման համար։
Օրինագծի անհրաժեշտությունը պայմանավորված է երկու գործոնով՝ փաստաբանական գրասենյակների ծանրաբեռնվածության աճով եւ նոր Քրեական եւ Քրեակատարողական օրենսգրքերի ուժի մեջ մտնելով։
«Չնայած փաստաբանների թվի ավելացմանը՝ նրանք ստիպված են ներգրավվել արտաժամյա աշխատանքներին՝ որեւէ վճար չստանալով»,- ասել է Բալյանը։ Եվ սա՝ չնայած այն բանին, որ Աշխատանքային օրենսգիրքը երաշխիքներ է տրամադրում։
Լրացուցիչ ֆինանսավորումը կիրականացվի միայն արտաժամյա աշխատանքի համար։ Միջոցները չեն տրամադրվի գրասենյակների ղեկավարներին եւ նրանց տեղակալներին։
