ԱՄՆ-ը կարծում է, որ Պաղեստինի ազգային վարչակազմը, որը վերահսկում է Հորդանան գետի Արևմտյան ափը, ընթացիկ հակամարտության ավարտից հետո Գազայի հատվածը կառավարելու համար համապատասխան մարմինն է, հաղորդում է CNN-ը՝ վկայակոչելով Պետքարտուղարի՝ Մերձավոր Արևելքի հարցերով օգնական Բարբարա Լիֆին։

«Ինչպիսին էլ որ լինեն Պաղեստինի ինքնավարության թերությունները, դա Արևմտյան ափի պաղեստինցիների կառավարությունն է: Մենք հավատում ենք, որ, ի վերջո, պաղեստինցիների ձայնն ու ձգտումները Գազայի հետկոնֆլիկտային կառավարման և անվտանգության համար պետք է կենտրոնական լինեն», - Ներկայացուցիչների պալատի արտաքին հարաբերությունների հանձնաժողովի նիստում  ասել է նա, հաղորդում է BBC-ն:

Լիֆը հավելել է, որ Պետդեպարտամենտն «այժմ դիտարկում է այս բոլոր հարցերը» և «կցանկանային քննարկումները սկսել ավելի շուտ, քան ուշ»: Միացյալ Նահանգները հորդորել է Իսրայելին խուսափել Գազայի զավթումից, երբ ՀԱՄԱՍ-ը դադարի կառավարել այդ տարածքը, սակայն Իսրայելի վարչապետ Բենիամին Նեթանյահուն մտահոգություն է հայտնել ԱՄՆ պաշտոնյաների շրջանում՝ այս շաբաթվա սկզբին ասելով, որ Իսրայելը պատասխանատու կլինի Գազայի անվտանգության համար «անորոշ ժամանակով»:

Լիֆի մեկնաբանությունները համընկնում են ԱՄՆ պետքարտուղար Անտոնի Բլինկենի մեկնաբանությունների հետ, ով Տոկիոյում մամուլի ասուլիսի ժամանակ ասաց, որ կայուն խաղաղությունը պետք է ներառի «Պաղեստինի գլխավորած կառավարումը և Գազայի միավորումը Արևմտյան ափին հետ՝ Պաղեստինի ինքնավարության իշխանության ներքո», նշում է  CNN-ը։ ԱՄՆ-ն Իսրայելին կոչ է անում «խուսափել Գազայի օկուպացիայից, որը պետք է կառավարվի Պաղեստինի իշխանությունների կողմից»։