Խոր ցավ ապրեցի Ժիրայր Ավանյանի մահվան կապակցությամբ: Մենք համադասարանցիներ էինք, որոշ ժամանակ հետո նա մեկնեց Միացյալ Նահանգներ, սակայն հայրենիքի հանդեպ սերը նրան ետ բերեց ծննդավայր: Այս մասին նշել է Հայաստանի չորրորդ նախագահ Արմեն Սարգսյանը:

«Ժիրիկը ժամանակակից Երևանի խորհրդանիշերից էր, արարող մարդու անհանգիստ ու որոնող տեսակ , որն իր ստեղծարար աշխատանքով ու մտածողությամբ նոր որակի ու մակարդակի բարձրացրեց հայկական ազգային խոհանոցը:

Նա իր շուրջը և իրենով գունագեղ կոլորիտ էր ստեղծում...Երևանյան խճանկարից պակասեց մի շատ կարևոր և սիրուն գույն:

Հանգչիր խաղաղությամբ, լավ մարդ, լավ ընկեր»,- նշել է նա:

Ավելի վաղ NEWS.am-ը հայտնել էր, որ նախօրեին մահացել է «Դոլմամա» ռեստորանի սեփականատեր, գործարար Ժիրայր Ավանյանը։

Նշենք, որ գործարարը «Դոլմամա» ռեստորանը հիմնադրել է 1998թ․-ին՝ իր առջև նպատակ ունենալով վերականգնել բուն հայկական խոհանոցը:

Նշենք, որ գործարարը Հայաստան էր տեղափոխվել ԱՄՆ-ից։

Նա նաև «Թռչող ջայլամ» ռեստորանի (Դիլիջան), «Սանտա Ֆամիլիա» գաստրոնոմի (Երևան),  «Աղաքսակ» հուշանվերների խանութի (Երևան) հիմնադիրը և սեփականատերն էր։