նախընտրելի դարձնել
Ֆրանսիայի արտգործնախարար Ստեֆան Սեժուրնեն Պեկին այցից առաջ Չինաստանին հորդորել է օգտագործել իր ազդեցությունը Ռուսաստանի վրա՝ Ուկրաինայում պատերազմին վերջ տալու համար: Դրա մասին հայտնել է Euronews-ը։
Դիվանագետը բանակցություններ է վարում չինացի գործընկեր Վան Իի հետ։
Փարիզը Պեկինի վրա ճնշում է գործադրում 2022-ի փետրվարին Ուկրաինա Ռուսաստանի լայնամասշտաբ ներխուժումից հետո Մոսկվայի հետ հարաբերությունների խորացման համար:
Ֆրանսիայի արտաքին գործերի նախարար Ստեֆան Սեժուրնեն հայտնել է, որ բանակցությունների ընթացքում կխոսեն ոչ միայն ռազմավարության, այլև՝ Ուկրաինայում խաղաղություն ապահովել հնարավորությունների, ընդհուպ՝ ռուսական զորքերի դուրսբերման մասին:
«Ուստի մենք պետք է շատ հստակ ազդանշան ուղարկենք Ռուսաստանին։ Ակնկալում ենք, որ այնպիսի խոշոր երկիրը, ինչպիսին Չինաստանն է, նույնպես շատ հստակ ազդակներ կուղարկի Ռուսաստանի Դաշնությանը»,- ընդգծել է ֆրանսիացի դիվանագետը։
Օրակարգում են նաեւ առեւտրին առնչվող հարցեր։ Ֆրանսիան անհանգստացած է, որ եվրոպական շուկա մուտք գործող չինական էժան էլեկտրական մեքենաների հեղեղը կհարվածի տեղական ավտոարդյունաբերությանը և կհանգեցնի աշխատատեղերի կորստի:
Սեժուրնեն Պեկին կայցելի Չինաստանի նախագահ Սի Ծինպինի՝ այս տարվա գարնանը Ֆրանսիա նախատեսված այցից առաջ:
