Նոր Զելանդիան կիրակի օրը հայտարարել է, որ անհապաղ փոփոխություններ է կատարում աշխատանքային վիզաների իր ծրագրում՝ անցած տարվա գրեթե ռեկորդային «անկայուն» միգրացիայից հետո, հաղորդում է Reuters-ը:

Փոփոխությունները ներառում են այնպիսի միջոցառումներ, ինչպիսիք են ցածր որակավորում ունեցող աշխատատեղերի համար անգլերեն լեզվի իմացության պահանջի ներդրումը և գործատուի աշխատանքային վիզաների մեծ մասի համար որակավորման և աշխատանքային փորձի նվազագույն շեմ սահմանելը: Ցածր որակավորում ունեցող աշխատատեղերի մեծ մասի շարունակական առավելագույն ժամկետը նույնպես կնվազեցվի հինգ տարուց մինչև երեք տարի:

«Կառավարությունը կենտրոնացած է բարձր որակավորում ունեցող միգրանտների ներգրավման և պահպանման վրա, ինչպիսիք են միջնակարգ դպրոցների ուսուցիչները»,- ասվում է երկրի ներգաղթի նախարար Էրիկա Սթենֆորդի հայտարարության մեջ:

«Միևնույն ժամանակ մենք պետք է ապահովենք, որ նորզելանդացիները լինեն այնպիսի աշխատատեղեր ստանալու առաջին շարքերում, որտեղ որակյալ մասնագետների պակաս չկա», - ասել է նախարարը։

Անցյալ տարի Նոր Զելանդիա է գաղթել գրեթե ռեկորդային թվով՝ 173,000 մարդ, ասվում է հայտարարության մեջ:

Համավարակի ավարտից հետո Նոր Զելանդիայում, որն ունի մոտ 5,1 միլիոն բնակչություն, ներգաղթյալների թվի արագ աճ է գրանցվել,  ինչն անցյալ տարի մտավախություն է առաջացրել, որ դա նպաստում է արժեզրկման աճին:

Հարևան Ավստրալիան, որտեղ նույնպես նկատվել է ներգաղթյալների թվի զգալի աճ, հայտարարել է, որ առաջիկա երկու տարվա ընթացքում  երկու անգամ կնվազեցնի միգրանտների հոսքը: