Մոնրեալից մի ընտանիք CTV News-ին հայտնել է, որ իրենց հարազատի մարմինը, որը մահացել է Կուբայում արձակուրդի ժամանակ, տեղափոխվում է Կանադա, այն սխալմամբ Ռուսաստան ուղարկելուց հետո:

Միրիամ Ջարջուրը լրատվամիջոցին տված հարցազրույցում ասել է, որ ինքը և իր եղբայրը ճանաչել են իրենց հոր մարմինը՝ Կանադայի կառավարությունից ապացույցներ ստանալուց հետո:

68-ամյա Ֆարաջ Ջարջուրը մահացել է մարտի 22-ին Կուբայի Վարադերո քաղաքում, և երբ զավակները գնացել են իրենց հոր մարմինը ճանաչելու, դագաղում պառկած է եղել մոտ 20 տարով փոքր ռուս տղամարդ:

Ընտանիքը դեռևս սպասում է մանրամասների, թե ինչպես և երբ նրա դին կտեղափոխեն Կանադա։

«Մենք չգիտենք, թե երբ կհասնի հորս մարմինը», - ասել է Միրիամը: «Մենք պարզապես գնացինք կարճատև արձակուրդի, բայց տոնը վերածվեց ողբերգության».

Նա նաև հաստատել է, որ Կուբայի կառավարությունը ընտանիքին է վերադարձրել 10,000 դոլարը, որը նրանք վճարել են իրենց հոր հայրենիք տեղափոխման համար:

Չորեքշաբթի Կուբայի արտաքին գործերի նախարար Բրունո Ռոդրիգեսը ներողություն է խնդրել զոհվածի ընտանիքից։

«Կուբայի իշխանությունները հետաքննություն են անցկացնում միջադեպը պարզելու համար։ «Ես իմ անկեղծ ցավակցությունն եմ հայտնում և ներողություն եմ խնդրում հանգուցյալի հարազատներից ու մտերիմներից»,- ասաց նա։

Կանադայի արտաքին գործերի նախարար Մելանի Ժոլին միջադեպը անվանել է «անպատկերացնելի իրավիճակ»՝ հավելելով, որ «Կանադան կշարունակի օգնել Ջարջուրի ընտանիքին, քանի դեռ այս իրավիճակը չի կարգավորվել»: