Աջ կուսակցությունների թեկնածու Էդմունդո Գոնսալես Ուրուտիան, որին ԱՄՆ-ն և արևմտյան երկրները համարում են նախագահական ընտրությունների հաղթող, վախեցավ իրեն Վենեսուելայի նախագահ հռչակել։ Այս մասին Կարակասի կենտրոնում բազմահազարանոց հանրահավաքի ժամանակ հայտարարել է բոլիվարական հանրապետության նախագահ Նիկոլաս Մադուրոն։

«Դու փախար, Գոնսալես Ուրուտիա։ Այսօր նա վախեցավ իրեն նախագահ հռչակել, երդում տալ և չգնաց ընդդիմության ցույցին։ Նա վախենում էր, նրանք պատրաստվում էին նրան նախագահական ժապավեն  հագցնել, և նա պատրաստվում էր երդում տալ, բայց վախեցավ», - ասել է Մադուրոն շաբաթ օրը Միրաֆլորեսի նախագահական պալատի մոտ տեղի ունեցած հանրահավաքում։

«Մեզ ուզում են պարտադրել [ինքնահռչակ նախագահ Խուան] Գուայդոյի տխրահռչակ պատմությունը», - ասել է նախագահը: «Երեկ ինձ ասացին, որ կոնֆլիկտ է եղել։ Գուայդոն՝ Մայամիի իր առանձնատանը, չի ցանկանում նախագահական ժապավենը հանձնել ծերուկ [Գոնսալեսին]»,- կատակով ասել է նախագահը։ Նա հայտարարել է, որ ««Գուայդո, Գոնսալես Ուրուտիա». երկրորդ մասը չի անցնի, այսօր մենք դարձել ենք էլ ավելի ուժեղ, ավելի փորձառու, ավելի լավ ենք պատրաստված և թույլ չենք տա, որ նախագահական իշխանությունը յուրացվի»։

Մադուրոն հայտնել է, որ պատրաստ է առաջիկայում ազգային երկխոսություն սկսել քաղաքական, տնտեսական, սոցիալական, մշակութային և կրոնական հարցերի շուրջ։

Շաբաթվա կեսին ԱՄՆ պետքարտուղարի՝ արևմտյան կիսագնդի հարցերով օգնական Բրայան Նիկոլսն ասել էր, որ Վաշինգտոնի վարչակազմի կարծիքով  մյուս պետությունները պետք է Գոնսալեսին ճանաչեն Վենեսուելայի նախագահական ընտրությունների հաղթող։ Լատինական Ամերիկայի մի քանի երկրներ հետևեցին Վաշինգտոնի այս խորհրդին կամ կասկած հայտնեցին հանրապետությունում հայտարարված քվեարկության արդյունքների օբյեկտիվության վերաբերյալ։