նախընտրելի դարձնել
Meta ընկերությունը կողմնորոշում է կատարում դեպի արհեստական բանականության զարգացող ոլորտը՝ իր ռոբոտային նորարարությունների մեջ ներառելով շոշափման զգացողությունը, գրում է Interesting Engineering-ը։
Տեխնոլոգիական հսկան համագործակցում է ամերիկյան GelSight սենսորային ընկերության և ռոբոտաշինության հարավկորեական Wonik Robotics ընկերության հետ՝ արհեստական բանականության համար շոշափող սենսորների առևտրայնացման համար: Նոր սարքերը նախատեսված են ոչ թե սպառողների, այլ գիտնականների համար։ Այդ նպատակով Meta-ն թողարկել է երեք հետազոտական արտեֆակտ՝ Sparsh, Digit 360 և Digit Plexus, որոնք ուղղված են զգայական ընկալմանը, ռոբոտների ճկունությանը և մարդ-ռոբոտ փոխգործակցությանը:
Բացի այդ, ընկերությունը ներկայացնում է PARTNR նոր թեստը՝ մարդ-ռոբոտ համագործակցության դեպքում պլանավորման և տրամաբանական մտածողության գնահատման համար:
Sparsh-ը, որը մշակվել է Վաշինգտոնի համալսարանի և Քարնեգի Մելլոնի համալսարանի հետ համագործակցությամբ, տեսողության վրա հիմնված շոշափողական ընկալման կոդավորիչների մոդելների հավաքածու է, որի նպատակը ռոբոտներին զգայական ընկալման կարողություններով օժտելն է: Այս ունակությունն անհրաժեշտ է ռոբոտաշինության տարբեր խնդիրներ լուծելու համար, օրինակ՝ որոշելու, թե որքան ճնշում կարող է գործադրվել օբյեկտի վրա՝ առանց վնաս պատճառելու:
Digit 360-ը մատի տեսքով արհեստական շոշափողական սենսոր է, որն օժտված է ավելի քան 18 զգայական կարողությամբ և ավելի քան 8 միլիոն տակսելով՝ մատիի ծայրին համակողմանի և մանրամասն դեֆորմացիաները ամրագրելու համար: Այս կառուցվածքը թույլ է տալիս ավելի լավ հասկանալ շրջակա միջավայրի հետ փոխազդեցությունը և օբյեկտների հետ մանիպուլյացիաները: Սենսորը ներառում է նաև արհեստական ինտելեկտի ներկառուցված մոդելներ, որոնք նվազագույնի են հասցնում կախվածությունը ամպային սերվերներից և թույլ են տալիս տեղայնորեն մշակել հպմանը արագ արձագանքները, որոնք համանման են մարդկանց և կենդանիների ռեֆլեքսային աղեղներին:
Digit Plexus-ը ծրագրային սարքավորման հարթակ է, որը հեշտացնում է ռոբոտային հավելվածների մշակումը: Այն հնարավորություն է տալիս մատների ծայրերի և մաշկի տարբեր սենսորներին ինտեգրվել ռոբոտի մեկ թևի մեջ՝ կոդավորելով շոշափողական տվյալները և մեկ մալուխի միջոցով դրանք փոխանցելով գլխավոր համակարգչին։ Ներկայացնելով Digit Plexus-ի կոդը և դիզայնը՝ Meta-ն հույս ունի օգնել հետազոտողներին բարելավել ռոբոտների ճկունությունը:
