Ռուսական կողմի նախաձեռնությամբ հեռախոսազրույց է տեղի ունեցել ՌԴ նախագահ Վլադիմիր Պուտինի և Ղազախստանի Հանրապետության նախագահ Կասիմ-Ժոմարտ Տոկաևի միջև, հայտնում է Կրեմլի մամուլի ծառայությունը։

Նշվում է, որ պետությունների ղեկավարները ցավակցություններ են փոխանակել դեկտեմբերի 25-ին Ակտաու քաղաքի մոտ «Ադրբեջանական ավիաուղիներ»-ի ինքնաթիռի կործանման կապակցությամբ, որում եղել են Ռուսաստանի և Ղազախստանի քաղաքացիներ։

«Կողմերը ելնում են նրանից, որ Ղազախստանի կառավարական հանձնաժողովը, որը հետաքննում է տեղի ունեցածի բոլոր մանրամասները, կներգրավի փորձագետներ Ռուսաստանից, Ադրբեջանից և Բրազիլիայից՝ վթարի վայրում հայտնաբերված թռիչքի ձայնագրիչները վերծանելու համար։ Ղազախստանի տարածքում իրականացվող այս աշխատանքը լինելու է օբյեկտիվ և թափանցիկ։

Ղազախստանի նախագահը շնորհակալություն է հայտնել Վլադիմիր Պուտինին ԱՊՀ ոչ պաշտոնական գագաթնաժողովի և Եվրասիական բարձրագույն տնտեսական խորհրդի նիստի ժամանակ, որը վերջերս տեղի ունեցավ Լենինգրադի մարզում, ցուցաբերած հյուրընկալության համար։

Երկու երկրների ղեկավարները մշտական ​​կապի մեջ կմնան ինչպես ադրբեջանական ինքնաթիռի ողբերգական միջադեպի բոլոր հանգամանքների հետաքննության, այնպես էլ ռուս-ղազախական համագործակցության հետագա զարգացման արդիական հարցերի շուրջ»,- ասվում է Կրեմլի հայտարարությունում։