նախընտրելի դարձնել
Ճապոնիայի արտաքին գործերի նախարար Տակեսի Իվայան, որին Ճապոնիայի ութ այլ քաղաքացիների հետ, որպես պատասխան միջոց, մերժել են մուտք գործել Ռուսաստանի Դաշնություն, Մոսկվայի այս քայլն անընդունելի է համարել։ Միաժամանակ, նրա կարծիքով, անհրաժեշտ է պահպանել շփումը ռուսական կողմի հետ։
«Միանգամայն անընդունելի է պատասխանատվությունը Ճապոնիայի վրա գցելը»,- ասել է նա՝ կրկնելով Տոկիոյի դիրքորոշումը, որ Ռուսաստանի Դաշնության դեմ ճապոնական միջոցների սկզբնական պատճառն Ուկրաինայում տիրող իրավիճակն է։ Նրա խոսքով՝ ճապոնական կողմը նախատեսում է ափսոսանք հայտնել Ռուսաստանին այդ կապակցությամբ։
Միաժամանակ, Իվայան նշել է ռուսական կողմի հետ հաղորդակցության պահպանման կարեւորությունը։ «Ճապոնիայի եւ Ռուսաստանի հարաբերությունները ներկայում գտնվում են ծանր վիճակում, սակայն կան բազմաթիվ հարցեր, որոնք պետք է լուծվեն, հատկապես դիվանագիտականգերատեսչությունների միջեւ, ուստի կան բաներ, որոնց շուրջ անհրաժեշտ է հաղորդակցվել Ռուսաստանի հետ»,- ասել է նա։
«Այս տեսանկյունից ես ցավում եմ, որ ինձ արգելում են մուտք գործել [Ռուսաստան]։ Մենք կցանկանայինք շարունակել շփումը ռուսական կողմի հետ՝ մեր երկկողմ հարաբերությունները պատշաճ կերպով կառավարելու համար»,- ավելացրել է Իվայան։
Մարտի 3-ին ՌԴ ԱԳՆ-ն հայտնել է, որ ի պատասխան Ճապոնիայի պատժամիջոցների քաղաքականության՝ արգելում է մուտքն այս երկրի ինը քաղաքացու համար։ Նրանց թվում են Իվայան, Ուկրաինայում Ճապոնիայի դեսպան Մասասի Նակագոմեն, Ուկրաինայում նախկին դեսպան Կունինորի Մացուդան, Ճապոնիայի միջազգային համագործակցության գործակալության (JICA) ավագ փոխնախագահ Սյոհեյ Հարան, Ուկրաինայում JICA գրասենյակի ղեկավար Հիդեկի Մացունագան, ինչպես նաեւ IHI Corporation-ի, Isuzu Motors Limited-ի, Prodrone-ի եւ Cyberdyne-ի նախագահները:
