Պետդեպարտամենտի վերակազմավորումը կհանգեցնի նրա մոտ 130 բաժինների փակմանը եւ առնվազն 700 պաշտոնների վերացմանը։ Այս մասին հայտնել է Reuters գործակալությունը՝ հղում կատարելով արտաքին քաղաքականության գերատեսչության բարեփոխման նախնական ծրագրեր պարունակող փաստաթղթին։

Նրա տվյալներով՝ Սենատի եւ Ներկայացուցիչների պալատի արտաքին հարաբերությունների հանձնաժողովներին ներկայացված փաստաթուղթը դրույթներ է պարունակում պետդեպարտամենտի 132 բյուրոների, գերատեսչությունների եւ ծրագրերի առաջիկա վերացման մասին։ Կկրճատվի 732 հաստիք, շատերը կտեղափոխվեն այլ գերատեսչություններ։ Մասնավորապես, ինչպես նշել է The Washington Post-ը, վերացվելու է քաղաքացիական անվտանգության, ժողովրդավարության եւ մարդու իրավունքների հարցերով պետքարտուղարի տեղակալի պաշտոնը։ Բացի այդ, պատերազմական հանցագործությունների, ինչպես նաեւ «հակամարտությունների եւ կայունացման գործողությունների» հետաքննության մեջ ներգրավված ծառայությունները կդադարեցնեն իրենց գործունեությունը:

Պարբերականը նշել է, որ պետդեպարտամենտի բարեփոխումը, դատելով փաստաթղթում շարադրված ծրագրերից, «այնքան էլ արմատական» չի լինի, որքան սպասվում էր։ Մասնավորապես, ներկայում չի խոսվում աֆրիկյան մայրցամաքում ամերիկյան դիվանագիտական ​​առաքելությունների գործունեությունը սահմանափակելու եւ ԱԳՆ մասնագիտացված բաժինը Աֆրիկայի հարցերով հատուկ ներկայացուցչի գրասենյակով փոխարինելու մասին։

Reuters-ն ընդգծել է, որ վերակազմավորման ծրագրով պետքարտուղարի տեղակալներից պահանջվում է պլաններ մշակել՝ կրճատելու իրենց ենթակաների 15 տոկոսը: Պետդեպարտամենտում հատուկ ստեղծված աշխատանքային խումբը մինչեւ հուլիսի 1-ը պետք է ներկայացնի գերատեսչության վերակազմավորման մանրամասն ծրագրերը։