Մոնղոլիայի Պետական ​​Մեծ Խուրալը գաղտնի քվեարկությունից հետո որոշել է պաշտոնանկ անել վարչապետ Լուվսաննամսրայն Օյուն-Էրդենեին։ Նա կշարունակի կատարել իր պարտականությունները մինչև կառավարության նոր ղեկավարի նշանակումը։

«Մոնղոլիայի խորհրդարանի նստաշրջանի կանոնակարգի մասին օրենքի համաձայն՝ պատգամավորների մեծամասնությունը, այսինքն՝ 64 մարդ, պետք է քվեարկեր վարչապետի վստահության օգտին։ Քանի որ վստահության քվեարկությունը խորհրդարանականների մեծամասնության կողմից գաղտնի քվեարկությամբ չի հաստատվել, ընդունվել է որոշում՝ քննարկելու կառավարության ղեկավարի հրաժարականի հարցը», - հայտնել է խորհրդարանի մամուլի կենտրոնը։

Հայտնի է դարձել նաև, որ խորհրդարանի խոսնակ Դաշզեգվին Ամարբայասգալանը հանձնարարել է պաշտոնաթող վարչապետին շարունակել կատարել իր պարտականությունները մինչև կաբինետի նոր ղեկավարի նշանակումը։ Օրենքի համաձայն՝ նոր վարչապետ պետք է նշանակվի 30 օրվա ընթացքում։

Վերջին օրերին Ուլան Բատորի կենտրոնական հրապարակում տեղի են ունենում խաղաղ բողոքի ցույցեր։ Դրանցից մեկի մասնակիցները պահանջում են վարչապետի հրաժարականը և բացատրություն նրա 22-ամյա որդու կողմից հարսնացուի համար նվերների վրա կատարված բարձր ծախսերի համար, որը սոցիալական ցանցերում հրապարակել է ադամանդե մատանու, մեքենայի և մի քանի հազար դոլար արժողությամբ դիզայներական պայուսակի լուսանկարներ։