Բելառուսի նախագահ Ալեքսանդր Լուկաշենկոն հունիսի 7-ին Ազգային ֆուտբոլային մարզադաշտի հանդիսավոր բացման արարողությանն առաջարկել է Մինսկում ՉԺՀ նախագահ Սի Ծինփինի արձանը տեղադրել, հայտնում է БелТА-ն։

Բելառուսի նախագահի՝ Չինաստան կատարած հերթական այցի ժամանակ Սի Ծինփինն անսպասելիորեն նրան երկու մակետ էր ցուցադրել՝ միջազգային մակարդակի լողավազանի և ֆուտբոլային մարզադաշտի։ ՉԺՀ նախագահն այն ժամանակ հայտարարել էր, որ այդ օբյեկտների կառուցումը նվեր կլինի բելառուս ժողովրդին։

«Ես միանգամից չհավատացի՝ լավ ճանաչելով Չինաստանը, չինացիներին։ Բայց հետո մտածեցի՝ չինացիները զուր տեղը ոչինչ չեն ասում։ Առավել ևս՝ առաջին դեմքը։ Ահա այսպես ամեն ինչ սկսվեց», - հայտարարել է Լուկաշենկոն։

Մարզադաշտը կառուցվել է համեմատաբար արագ։ Մինսկում հայտնվել է նաև միջազգային կարգի նոր լողավազան։ «Լիովին չինացի ժողովրդի նվերն է։ Այնտեղ բելառուսական փող չկա», - ասել է Լուկաշենկոն։

«Մենք պաշտոնապես բացում ենք մեծագույն «հուշարձանը»։ Ես մուտքի մոտ ասացի (մարզադաշտի մոտ տեղադրված է Բելառուսի և Չինաստանի ֆուտբոլիստներին պատկերող քանդակագործական կոմպոզիցիա։ - Ծանոթ․ БелТА)․ տեղին կլիներ այստեղ տեղադրել իմ ընկեր Սի Ծինփինի արձանը։ Որովհետև միայն նրա շնորհիվ են չինացիներն իրենց հաշվին կառուցել այս մարզադաշտը։ Ինչպես նախարարն ասաց, Եվրոպայում սրանից քիչ կա», - ընդգծել է Ալեքսանդր Լուկաշենկոն։