Ղազախստանի նախագահ Կասիմ-Ժոմարտ Տոկաևը նոր պաշտպանության նախարար է նշանակել, հայտնում է Tengrinews.kz-ը՝ հղում անելով Տոկաևի մամուլի ծառայությանը։

Նա Դաուրեն Կոսանովն է։

«Պետության ղեկավարի հրամանագրով Դաուրեն Ժումատաևիչ Կոսանովը նշանակվել է Ղազախստանի Հանրապետության պաշտպանության նախարար, նա ազատվել է նախկինում զբաղեցրած պաշտոնից», - ասվում է հաղորդագրության մեջ։

Մինչև ՊՆ ղեկավարի պաշտոնում նշանակվելը Դաուրեն Կոսանովը եղել է պաշտպանության նախարարի տեղակալ - Ղազախստանի Զինված ուժերի Օդային պաշտպանության ուժերի գլխավոր հրամանատար։

Դաուրեն Կոսանովը 55 տարեկան է։ Ավարտել է Արմավիրի օդաչուների բարձրագույն ռազմական ավիացիոն ուսումնարանը (1990), Յու. Ա. Գագարինի անվան ռազմաօդային ակադեմիան, ՌԴ Զինված ուժերի Գլխավոր շտաբի ռազմական ակադեմիան։

Զբաղեցրել է Կարագանդայի ավիաբազայի շտաբի պետի, Շիմքենդի ավիաբազայի հրամանատարի, Զինված ուժերի Օդային պաշտպանության ուժերի Ռազմաօդային ուժերի հրամանատարի, Ակտոբե քաղաքի Օդային պաշտպանության ուժերի ռազմական ինստիտուտի տնօրենի, Զինված ուժերի Օդային պաշտպանության ուժերի գլխավոր հրամանատարի, պաշտպանության նախարարի տեղակալ - Զինված ուժերի Օդային պաշտպանության ուժերի գլխավոր հրամանատարի պաշտոնները։

Ունի «Ռազմական օդաչու-դիպուկահար» կոչում, ավիացիայի գեներալ-լեյտենանտ է։

Ավելի վաղ Ռուսլան Ժակսիլիկովն ազատվել էր երկրի պաշտպանության նախարարի պաշտոնից։