Ուզո՞ւմ եք նոր քաղաքական կուսակցություն, դուք կստանաք այն։ Այս մասին սոցցանցերում գրել է միլիարդատեր Իլոն Մասկը։

«Ինչ վերաբերում է մեր երկիրը շռայլությամբ ու կաշառակերությամբ սնանկացնելուն, ապա մենք ապրում ենք միակուսակցական համակարգում, ոչ թե ժողովրդավարության պայմաններում։ Այսօր ձևավորվեց Ամերիկյան կուսակցությունը՝ ձեր ազատությունը վերադարձնելու համար»,- նշել է նա։

Մասկը խոսքով և ֆինանսապես աջակցել է Դոնալդ Թրամփին նախընտրական քարոզարշավի և հանրապետականի երկրորդ ժամկետի սկզբում, հիշեցնում է BBC-ն։

Սակայն ավելի ուշ նա հեռացել է Թրամփի վարչակազմից, լքել իր ստեղծած «Կառավարության արդյունավետության դեպարտամենտ» թիմի ղեկավարի պաշտոնը (այն պաշտոնական իմաստով իրական նախարարություն չէ) և նոր բյուջեի պատճառով սոցցանցերում բուռն վիճաբանության մեջ մտել հենց Թրամփի հետ։ Այդ վիճաբանությունը վերսկսվել է այս շաբաթ, սակայն դա չի խանգարել Կոնգրեսում բյուջեի հաստատմանը. ուրբաթ օրը Թրամփն այն ստորագրել է ԱՄՆ Անկախության օրը։

Մասկը քննադատել է Թրամփի բյուջեն շռայլության և պետական պարտքի ավելացման համար։ «Ինչ վերաբերում է մեր երկիրը անտնտեսվարությամբ և կոռուպցիայով քայքայելուն, ապա մենք ապրում ենք միակուսակցական համակարգում, ոչ թե ժողովրդավարության պայմաններում»,- գրել է գործարարը։

Թեև XIX դարի կեսերից ի վեր ԱՄՆ-ում իշխանության են գալիս հերթով Դեմոկրատական և Հանրապետական կուսակցությունները, երկրում գոյություն են ունեցել և ունեն այլ կուսակցություններ։ Ավելի հեռավոր անցյալում Մասկն աջակցում էր նաև դեմոկրատներին, սակայն այդ ժամանակվանից նա զգալիորեն տեղաշարժվել է դեպի աջ, ուստի նրա պոտենցիալ նոր կուսակցությունը կարող է ձայներ խլել առավելապես հանրապետականներից։

Մասկն առայժմ չի բացահայտել իր հետագա քաղաքական ռազմավարությունը։ Նա չի կարող առաջադրվել նախագահի պաշտոնում, քանի որ ծնվել է ԱՄՆ-ի սահմաններից դուրս։