ԱՄՆ նախագահ Դոնալդ Թրամփի ընտանեկան բիզնեսը՝ Trump Organization ընկերությունը, կմիավորի իր ուժերը ռումինական կառուցապատող SDC Imobiliare-ի հետ՝ Ռումինիայի մայրաքաղաք Բուխարեստում լյուքս դասի բնակելի շենք կառուցելու համար։ Այս մասին հայտնում է Reuters-ը։

«Trump Tower Bucharest-ը կկառուցվի Ռումինիայի մայրաքաղաքի՝ Եվրոպայի ամենավառ ու դինամիկ զարգացող շուկաներից մեկի սրտում և տարածաշրջան կբերի պրեմիում դասի բնակելի համալիրներ՝ Trump ապրանքանիշի ներքո», - ասված է ընկերությունների հայտարարության մեջ։

Ընդ որում, նրանք չեն մանրամասնել աշտարակի կառուցման վայրը և աշխատանքների մեկնարկի ամսաթիվը։

Ռումինիայի տնտեսությունը առաջին եռամսյակում կանգ է առել՝ քաղաքական երկարատև ճգնաժամի և հնարավոր անկման մտահոգությունների ֆոնին՝ հետ մնալով Կենտրոնական և Արևելյան Եվրոպայի իր գործընկերների մեծ մասից։

Ռումինիան, որը Եվրոպական միության և ՆԱՏՕ-ի անդամ երկիր է, հայտնվել է Եվրոպայի և Թրամփի վարչակազմի միջև ժողովրդավարական սկզբունքների շուրջ ծագած վեճի կենտրոնում։ Սա տեղի է ունեցել այն բանից հետո, երբ դեկտեմբերին Սահմանադրական դատարանը չեղարկել է նախագահական ընթացիկ քվեարկությունը՝ ռուսական միջամտության կասկածների պատճառով, որոնք Մոսկվայի կողմից հերքվել են հետագայում։

ԱՄՆ փոխնախագահ Ջեյ Դի Վենսը հայտարարել է, որ Ռումինիայի ընտրությունները չեղարկելու որոշումը, որոնցում առաջատար է եղել ծայրահեղ աջակողմյան, պրոռուսական թեկնածուն, հիմնված է «թույլ ապացույցների» վրա և նշանակում է, որ Բուխարեստը չի կիսում ամերիկյան արժեքները։

Մայիսին երկրում երկրորդ անգամ են նախագահական ընտրություններ տեղի ունեցել և հաղթանակ է տարել կենտրոնամետ նախագահ Նիկուշոր Դանը, որին Թրամփը հետագայում շնորհավորել է հաղթանակի կապակցությամբ։