«Օսկար» կինոմրցանակաբաշխության «Օտարալեզու լավագույն ֆիլմ» անվանակարգում 9 ֆիլմ է ներկայացված: Հունվարի 18-ին ամերիկյան կինոակադեմիան հանրությանը ներկայացրեց ոսկե արձանիկի հավակնորդների այսպես կոչված «երկար ցուցակը»: 

Ցուցակում նշված են բելգիացի Մայքլ Ռոսկամի, կանադացի Ֆիլիպ Ֆալարդեի, դանիացի Օլե Քրիստիան Մեդսենի ֆիլմերը: 

Առաջին հնգյակը եզրափակում են գերմանացի Վիմ Վենդերսի «Պինա» եւ իրանացի Ացգար Ֆարհադիի խոստումնալից «Նադերի եւ Սիմինի ամուսնալուծությունը»  ֆիլմերը: Անցյալ տարի այն «Բեռլինալե» 61-րդ կինոփառատոնին «Ոսկե արջի» է արժանացել, իսկ այս տարի` «Ոսկե գլոբուսի»:  Իր անվանակարգում այս ֆիլմը համարվում է «Օսկարի» համար առաջին առաջատարը:

Ցանկը եզրափակում են Կաննի փառատոնում հաջողություն ունեցած «Նշում» (Իսրայել), «Օմարն է սպանել ինձ» (Մարոկկո), «Մթություն» (Լեհաստան) եւ «Ծիածանների պատերազմները. Սեդիկ Բալե» (Թայվան) ֆիլմերը:

Այս անվանակարգում «Օսկարի» են առաջադրվել ֆիլմեր 63 երկրներից:

Ռուսաստանը ներկայացնում է Նիկիտա Միխալկովի «Արեւից կիզվածները - 2. Ցիտադել» ֆիլմը: Այս կինոնկարը հավակնորդների «երկար ցուցակ» չի ընդգրկվել: Ցուցակում չկա նաեւ Ղազախստանի կողմից առաջադրված Եգոր Միխալկով-Կոնչալովսկիի «Վերադարձ "Ա"» կինոնկարը:

«Օսկարի» առաջադրվածների անունները կհայտարարվեն 2012 թվականի հունվարի 24-ին «Սամյուել Գոլդուին» թատրոնում, որը գտնվում է կինոակադեմիայի շենքի ներսում: 84-րդ  մրցանակաբաշխությունը կկայանա փետրվարի 26-ին, հաղորդում է ԻՏԱՌ-ՏԱՍՍ-ը: