Ստոկհոլմի արվարձաններից մեկի բնակիչը դուրս է եկել այգի՝ հողից որդեր հանելու, և դրա փոխարեն հայտնաբերել է մի գանձ, որը կարող է վերաշարադրել շվեդական պատմության մի հատված, գրում է Live Science-ը։

Գետնի տակ նա հայտնաբերել է հին պղնձե կաթսա՝ լիքը արծաթե մետաղադրամներով, մատանիներով, կախազարդերով և մանյակներով։ Գտածոյի ընդհանուր քաշը կազմել է մոտ վեց կիլոգրամ, իսկ մետաղադրամների քանակը, ըստ հնագետների գնահատականների, կարող է հասնել քսան հազարի։

Փորձագետները պարզել են, որ մետաղադրամների մեծ մասը պատկանում է XII դարին։ Դրանց թվում կան հազվագյուտ նմուշներ, որոնք հատվել են Կնուտ Էրիքսոն թագավորի (1173–1195 թթ.) օրոք՝ «KANUTUS» մակագրությամբ։ Կան նաև հազվագյուտ մետաղադրամներ՝ եպիսկոպոսի պատկերով, որը ձեռքին գավազան է պահում. նման մետաղադրամները թողարկվել են սահմանափակ խմբաքանակներով։

Չնայած այն հանգամանքին, որ կաթսան ժամանակի ընթացքում խիստ ժանգոտվել է, պարունակությունը զարմանալիորեն լավ է պահպանվել։ Գանձը դարձել է Շվեդիայի պատմության մեջ վաղ միջնադարի արծաթե գանձերի ամենամեծ հայտնաբերումներից մեկը, և առաջին նման դեպքը Ստոկհոլմի շրջակայքում։ Հատկապես հետաքրքրական է, որ գանձը թաքցված է եղել քաղաքի հիմնադրումից առաջ, քանի որ Շվեդիայի մայրաքաղաքը հայտնվել է միայն 1252 թվականին։

Այժմ հնագետները մանրակրկիտ հետազոտություններ են իրականացնում․ ուսումնասիրում են համաձուլվածքի բաղադրությունը, մետաղադրամների ծագումը և գանձի կառուցվածքը։ Գիտնականները փորձում են հասկանալ, թե ով և ինչու է թաքցրել այդքան նշանակալի հարստությունը։ Ըստ վարկածներից մեկի, դա տեղի է ունեցել XII դարի վերջի անկայունության շրջանում, երբ տարածաշրջանը քաղաքական երկպառակությունների և հարձակումների թատերաբեմ էր։ Հնարավոր է՝ գանձի տերը փորձել է այդ կերպ փրկել իր խնայողությունները, բայց ինչ-ինչ պատճառներով այդպես էլ չի վերադարձել դրանց հետևից։