նախընտրելի դարձնել
Չինացի կենդանաբանները հայտնաբերել և նկարագրել են անսովոր բաց դեղնավուն լեզվով Diploderma ցեղի՝ նախկինում անհայտ մողեսի տեսակ: Մողեսի նոր տեսակը, որը կոչվում է Diploderma bifluviale, հայտնաբերվել է լեռնային Հենգդուան շրջանում, Դադու (Դադուհե) գետի վերին հոսանքներում՝ Չինաստանի հարավ-արևմուտքում (Սիչուան նահանգ): Հետազոտության արդյունքների մասին հայտնել է ZooKeys հանդեսը:
Հայտնաբերման վայրը առանձնահատուկ տեղանքով տարածք է՝ զառիթափ կիրճեր, բարձրադիր հովիտներ և թփերով աճող բուսականության մեկուսացված հատվածներ: Այդ առանձնահատկությունները պայմաններ են ստեղծում կենդանիների տեղայնացված ձևերի մեկուսացված ձևավորման համար:
Հետազոտությունը սկսվել է 2018 թվականին: Գիտարշավի խումբը հավաքել է մի քանի նմուշներ, որոնց ձևաբանական առանձնահատկությունները Diploderma ցեղի մյուս ներկայացուցիչների համար բնորոշ չեն: Հետագա վերլուծությունը՝ համեմատական կազմաբանության և մոլեկուլային մեթոդների կիրառմամբ, հաստատել է, որ մողեսը ներկայացնում է առանձին կենդանատեսակ:
Կենդանու մարմնի երկարությունը հասնում է վեցից յոթ սանտիմետրի: Այս մողեսը բնակվում է ծովի մակարդակից 2100-2500 մետր բարձրության վրա՝ նախընտրելով կիսաանապատ թփուտներով լանջերը: Նրա անատոմիական առանձնահատկություններից է բաց դեղին, ցորնագույնի լեզուն, որը տարբերակում է նրան մերձավոր ազգակից տեսակներից։
«bifluviale» անվանումն առնչվում է հայտնաբերման վայրին. առաջին նմուշները հայտնաբերվել են երկու՝ Չուօքսիցզյա և Ծիաոմուզու գետերի միախառնման հատվածում: Գիտնականների կարծիքով՝ այդ սողունը ներկայացնում է Չինաստանում պաշտոնապես գրանցված Diploderma-ի 47-րդ տեսակը:
