Նոր հետազոտությունը պարզել է, որ չնայած սոցիալական ցանցերում հուզական գրառումները հաճախ ավելի շատ լայքեր և կիսումներ են ստանում, դրանք հազվադեպ են հանգեցնում հետևորդների աճի և կարող են չաշխատել բազմազան լսարանի համար։

Ինդիանա և Էմորի համալսարանների հետազոտողները վերլուծել են ԱՄՆ սենատորների 2018 թվականի ընթացքում արած ավելի քան 70 000 թվիթ՝ Information Systems Research ամսագրում հրապարակված հետազոտության շրջանակում։ Նրանք հայտնաբերել են անսպասելի օրինաչափություն. հուզականորեն լիցքավորված բովանդակությունը մեծացնում է լսարանի հետ ներգրավվածությունը, բայց չի կարողանում արդյունավետորեն նոր հետևորդների գրավել։

Ավելին, հուզական բովանդակության ազդեցությունը մեծապես կախված է լսարանի բազմազանությունից. երբ քաղաքական գործչի հետևորդներն ունեն բազմազան քաղաքական ծագում, հուզական գրառումները պակաս արդյունավետ են, և ավելի լավ են գործում զուսպ հաղորդագրությունները։

Հետազոտությունը նաև ընդգծել է, որ հետևորդների աճի հիմնական շարժիչ ուժերը ոչ թե հույզերն են, այլ գրառումների բովանդակությունը (գրառումների թեմաները) և այլ «էական բնութագրեր»։

Հեղինակներն այս հայտնագործությունն անվանել են իր տեսակի մեջ առաջինը. մինչ այժմ համարվում էր, որ ուժեղ հուզականությունը միշտ դրական ազդեցություն է ունենում ժողովրդականության վրա, սակայն պարզվեց, որ դա անհամատեղելի է լայն և խառը լսարանի հետ։