Երեկ առավոտյան Թուրքիայում կրիպտոարժույթի Thodex բորսայի հիմնադիր Ֆարուք Ֆաթիհ Օզերը մահացած է հայտնաբերվել Թեքիրդաղի թիվ 1 F-տիպի առանձնապես խիստ ռեժիմի բանտի մեկուսարանում, հայտնում է NTV-ն։

Նա լոգարանի դռանը կախված է եղել սավանից։ Առայժմ հիմնական վարկածը ինքնասպանությունն է, սակայն Թեքիրդաղի դատախազությունը հետաքննություն է սկսել։

Օզերը նախկինում դատապարտվել էր 11 190 տարի 6 ամիս ազատազրկման՝ «հանցավոր կազմակերպություն ստեղծելու և ղեկավարելու, դրան մասնակցելու», «որակյալ խարդախության» և «գույքի լվացման» մեղադրանքներով։

Thodex կրիպտոարժույթի բորսան, ինչպես պնդվում է, բազմաթիվ մարդկանց է խաբել։ Օզերը ձերբակալվել էր Ալբանիայում 2022 թվականի օգոստոսի 30-ին և տեղափոխվել Թուրքիա։

Ալբանիայի վերաքննիչ դատարանի արտահանձնման որոշումից հետո Օզերը Թուրքիա է ժամանել 2023 թվականի ապրիլի 20-ին և ապրիլի 23-ին ձերբակալվել է Անատոլիայի արդարադատության պալատի հերթապահ դատավորի կողմից։

2023 թվականի սեպտեմբերի 7-ին Անատոլիայի 9-րդ ծանր քրեական դատարանը նրան մեղավոր է ճանաչել «կազմակերպություն ստեղծելու և ղեկավարելու, դրան մասնակցելու», «որակյալ խարդախության» և «գույքի լվացման» մեջ։

Դրանից հետո գործը փոխանցվել է Ստամբուլի վերաքննիչ դատարան, որն ազատ է արձակել Օզերին «հանցավոր կազմակերպություն ստեղծելու» մեղադրանքով, սակայն կալանքի տակ է թողել մնացած կետերով։ Գործը վերադարձվել է տեղական դատարան, և Օզերի ու ևս 20 ամբաստանյալների դատավարությունը վերսկսվել է։