Հայաստանի և Արաբական Միացյալ Էմիրությունների (ԱՄԷ) միջև առևտրի, ծառայությունների և ներդրումների վերաբերյալ համաձայնագիրը նոր հնարավորություններ է բացում տնտեսական և ռազմավարական համագործակցության համար։ Այս մասին NEWS.am-ի թղթակցի հետ զրույցում հայտարարել է Էմիրությունների քաղաքականության կենտրոնի հետազոտող Մարվան Ալբլուոշին։

«Սա հուսադրող նորություն է։ Գոյություն ունեն մի շարք ոլորտներ, որոնցում Հայաստանը և ԱՄԷ-ն կարող են համատեղ աշխատել՝ երկկողմ հարաբերությունները զարգացնելու համար։ Առաջին հերթին, խոսքը վերաբերում է մաքուր էներգիային, կանաչ անցմանը և արհեստական բանականության ոլորտի նախաձեռնություններին»,- նշել է Ալբլուոշին։ Նա ընդգծել է, որ այդ ուղղությունները կարող են համագործակցության և ներդրումային ակտիվության առանցքային կետեր դառնալ։

Միևնույն ժամանակ, փորձագետն ուշադրություն է հրավիրել ԱՄԷ-ի հետ Հայաստանի ռազմավարական նշանակության վրա։ «Հարավային Կովկասը կարևոր տարածաշրջան է՝ էներգետիկ ռեսուրսների, աշխարհաքաղաքական մրցակցության և բազմամյա լարվածության շնորհիվ։ Տարածաշրջանի կայունացումը և հակամարտությունների հավանականության նվազեցումը նպաստում են մեր աշխարհատնտեսական փոխակերպմանը, ինչպես նաև օգնում են նոր գործընկերներ և դաշնակիցներ ներգրավելուն»,- պարզաբանել է նա։

Ալբլուոշին հավելել է, որ Հայաստանը կարևոր դեր է կատարում տարածաշրջանի կայունության ապահովման գործում և ընդգծել է վերլուծական կենտրոնների ու փորձագետների միջև երկխոսությունը շարունակելու անհրաժեշտությունը։ «Մտքերի և փորձի փոխանակումը, երկու երկրների՝ Հայաստանի և Ադրբեջանի ներկայացուցիչների հանդիպումներն օգնում են կապակցել ռազմավարական շահերն ու ծրագրերը, ինչպես նաև ամրապնդում են փոխըմբռնումը։ Նման նախաձեռնությունները պետք է դառնան մեր հարաբերությունների մշտական մասը»,- նշել է փորձագետը՝ հավելելով, որ ԱՄԷ-ի հետ համաձայնագիրը հարթակ է ստեղծում հետագա տնտեսական և ռազմավարական համագործակցության համար՝ նոր հեռանկարներ բացելով երկու երկրների առջև։