Ատենակալների պալատը նախկին առաջին դասարանի ուսուցչուհի Աբիգեյլ Զվերներին հատկացրել է 10 միլիոն դոլարի փոխհատուցում՝ 2023 թվականի հունվարի 6-ին Վիրջինիա նահանգի Նյուպորտ Նյուզ քաղաքի Ռիչնեք տարրական դպրոցում ստացած վնասվածքների համար, երբ վեցամյա աշակերտը կրակել է նրան դպրոց բերած ատրճանակով, հաղորդում է NBC News-ը:

Երեք տղամարդուց և չորս կնոջից բաղկացած ատենակալների պալատը պարզել է, որ նախկին տնօրենի օգնական Էբոնի Փարքերը կոպիտ անփութություն է ցուցաբերել՝ անտեսելով այն նախազգուշացնող նշանները, որ երեխան կարող է զենք բերել դպրոց։ Ըստ Զվերների՝ հենց Փարքերի անգործությունն է հնարավոր դարձրել հարձակումը. տղան կրակել է նրա ձեռքին և կրծքին՝ նախքան ատրճանակը հանելը։

Մի քանի վկա, որոնց թվում՝ Զվերների գործընկերները, ատենակալներին ասել են, որ նրանք Փարքերին տեղեկացրել են աշակերտի զենքի մասին, բայց տնօրենի օգնականը անհրաժեշտ միջոցներ չի ձեռնարկել։ Զվերների փաստաբան Քևին Բինիազանը շեշտել է, որ դպրոցի կանոնակարգերը Փարքերին հստակորեն պարտավորեցնում են գործել ցանկացած սպառնալիքի դեպքում։

Փարքերի փաստաբան Սանդրա Դուգլասը պնդել է, որ իր հաճախորդը իրավական պարտավորություն չունի պաշտպանելու Զվերներին, և որ ենթադրյալ անգործությունը չի համարվում կոպիտ անփութություն։

Փարքերը մեղադրվում է երեխաների նկատմամբ բռնության և անփութության համար՝ կապված սպառնալիքի նկատմամբ իր ենթադրյալ անտարբերության հետ։