Դեկտեմբերի 27-ին Կամբոջայի և Թաիլանդի սահմանային գլխավոր կոմիտեի հատուկ նիստում ձեռք բերված հրադադարի համաձայնագիրը չի նշանակում Կամբոջայի կապիտուլյացիա կամ ինքնապաշտպանության իրավունքից հրաժարում։ Այս մասին դեկտեմբերի 29-ին հայտարարել է Կամբոջայի վարչապետ Հուն Մանեթը, ինչպես մեջբերել է «Քմեր Թայմս»-ը։

Նա ասել է, որ հրադադարի վերաբերյալ փոխադարձ համաձայնության գալու որոշումը «չի նշանակում, որ Կամբոջան կապիտուլյացիայի է ենթարկվում կամ պատրաստ է զոհաբերել իր տարածքային ամբողջականությունը խաղաղության համար», ինչպես նաև չի նշանակում, որ երկիրը «անկարող է կամ հրաժարվել է ինքնապաշտպանության իրավունքից»։ Ընդհակառակը, այս որոշումը ցույց է տալիս, որ երկիրը որոշել է խաղաղ ճանապարհով գնալ և իր ժողովրդի կյանքն ու բարեկեցությունը համարել իր բարձրագույն և ամենակարևոր առաջնահերթությունը՝ չնայած ճնշմանը կամ դժվարություններին, ընդգծել է վարչապետը։

Կամբոջան ամենաբարձր առաջնահերթությունն է տալիս «խաղաղությանը և զարգացմանը», հետևողականորեն աջակցելով և մասնակցելով տարածաշրջանային և համաշխարհային կարգի պահպանմանը՝ հիմնված միջազգային իրավունքի, պայմանագրերի, կոնվենցիաների և համաձայնագրերի վրա, որոնց միացել է Փնոմպենը, մասնավորապես՝ ՄԱԿ-ի կանոնադրության և ԱՍԵԱՆ-ի կանոնադրության վրա, նպատակ ունենալով տարածաշրջանի և աշխարհի բոլոր երկրների հետ խաղաղ և դրական համակեցություն, ընդգծեց կառավարության ղեկավարը։

Կամբոջան և Թաիլանդը համաձայնության եկան հրադադարի մասին, որը ուժի մեջ մտավ դեկտեմբերի 27-ին, տեղական ժամանակով ժամը 12:00-ին, երկու երկրների սահմանային գլխավոր կոմիտեի շաբաթ օրը կայացած երրորդ հատուկ նիստում։ Հանդիպումից հետո տարածված համատեղ հայտարարության մեջ նշվում էր, որ կողմերը համաձայն են անհապաղ դադարեցնել ռազմական գործողությունները, ներառյալ քաղաքացիական անձանց, քաղաքացիական օբյեկտների և ենթակառուցվածքների, ինչպես նաև երկու կողմերի ռազմական թիրախների վրա հարձակումները։ Նրանք պարտավորվում են խուսափել չհրահրված կրակից, զորքերի առաջխաղացումից կամ տեղաշարժից դեպի մյուս կողմի դիրքերը կամ զորքերը։