Երկու մարդ անվնաս է մնացել Beechcraft Super King Air 200 ինքնաթիռի վթարից հետո։ Նրանք կարողացել են ավտոպիլոտի օգնությամբ անվտանգ վայրէջք կատարել Ռոքի-Մաունթին Մետրոպոլիտեն օդանավակայանի թռիչքուղում՝ Դենվերի մոտակայքում։ Ավտոպիլոտի համակարգը ստանձնել է ինքնաթիռի կառավարումը և պատմության մեջ առաջին անգամ բոլորովին ինքնուրույն արտակարգ վայրէջք է կատարել, գրում է Futurism-ը։

Դեկտեմբերի 20-ին երկշարժիչ տուրբոպտուտակավոր Beechcraft Super King Air 200 ինքնաթիռի խցիկում հանկարծակի ընկել է ճնշումը՝ Կոլորադո նահանգի վրայով թռիչքի ժամանակ։ Այնուհետև Garmin ընկերության Autoland արտակարգ ավտոմատ վայրէջքի համակարգը վերցրել է կառավարումը, ղեկավարել է ինքնաթիռը, կապ է հաստատել ավիադիսպետչերների հետ և վայրէջք կատարել օդանավակայանում։

Garmin ընկերության հայտարարության համաձայն, սա Autoland համակարգի առաջին կիրառումն է՝ իրական արտակարգ իրավիճակի ողջ ընթացքում։ Ինքնաթիռը շահագործող Buffalo River Aviation չարտերային ավիաընկերությունը նշում է, որ Autoland համակարգը ինքնաբերաբար գործարկվել է Ասպենից թռիչքի ժամանակ, երբ ինքնաթիռում ուղևորներ չեն եղել։

Տարբեր ավտոմատ վայրէջքի համակարգեր սովորաբար կիրառվել են բարդ եղանակային պայմաններում՝ վատ տեսանելիության դեպքում, բայց ոչ արտակարգ իրավիճակներում։ Իսկ Garmin ընկերության Autoland համակարգը, որը տեղադրված է մոտ 1700 ինքնաթիռում, պատկանում է ավտոմատ վայրէջքի նոր սերնդի համակարգերին, որոնք նախատեսված են բացառապես արտակարգ օգտագործման համար և մշակված են այնպես, որ ամբողջությամբ ստանձնում են թռիչքի կառավարումը՝ ինքնաթիռը վայրէջքի տանելու համար այն իրավիճակներում, երբ օդաչուն չի կարող կառավարել։ Այն փաստը, որ համակարգը հեշտությամբ հաղթահարել է իրական արտակարգ իրավիճակը, կարևոր հանգրվան է թռիչքների անվտանգության ապահովման գործում։

Այս դեպքում Autoland համակարգը ինքնաբերաբար գործարկվել է, քանի որ ինքնաթիռի խցիկում տեղի է ունեցել ճնշման արագ և անկառավարելի անկում, հայտնել է Buffalo River Aviation ընկերությունը։ Օդաչուները դրել են թթվածնային դիմակներ, ապա որոշել են թողնել ավտոմատ վայրէջքի համակարգը միացված։

Երբ կառավարումը անցել է Autoland-ին, ավտոպիլոտը ինքնուրույն ընտրել է վայրէջքի վայրը՝ հիմնվելով այնպիսի չափանիշների վրա, ինչպիսիք են հեռավորությունը և թռիչքուղու երկարությունը, և իր մտադրությունների մասին տեղեկացրել է դիսպետչերներին։ Այնուհետև ինքնաթիռը ինքնուրույն վայրէջք է կատարել։ Արտակարգ ծառայությունների աշխատակիցների հրապարակած տեսանյութում երևում է, թե ինչպես են երկու օդաչուները լքել ինքնաթիռը թռիչքուղում։

Այս դեպքում օդաչուները կամավոր որոշել են թույլ տալ, որ Autoland համակարգը վերցնի կառավարումը և չեն կորցրել գիտակցությունը՝ հակառակ նախնական ենթադրությունների։ Համակարգի ավտոմատացված ձայնը սխալմամբ տեղեկացրել է դիսպետչերներին, որ կառավարումը անցել է իրեն՝ օդաչուի անգործունակությունից հետո, ինչը հանգեցրել է խառնաշփոթի։

Չնայած համակարգը գործել է ճիշտ այնպես, ինչպես սպասվում էր, օդաչուները պատրաստ են եղել վերականգնել ինքնաթիռի ձեռքով կառավարումը, եթե համակարգը խափանվեր։ Օդաչուները գիտակցաբար որոշել են պահպանել և օգտագործել բոլոր հասանելի գործիքները անկանխատեսելի, արտակարգ իրավիճակում, ասված է ավիաընկերության հայտարարության մեջ։

ԱՄՆ Քաղաքացիական ավիացիայի դաշնային վարչությունը հայտարարել է, որ հետաքննություն է սկսել տվյալ միջադեպի վերաբերյալ։