Երկրորդ համաշխարհային պատերազմի ավարտից ի վեր առաջին անգամ Ֆրանսիայի բնական բնակչության աճի տեմպը 2025 թվականին կհասնի բացասական մակարդակի, ընդ որում՝ մահացությունները կգերազանցեն ծնունդներին։ Այս մասին ասվում է երկրի Ազգային վիճակագրության և տնտեսական հետազոտությունների ինստիտուտի (Insee) կողմից երեքշաբթի օրը հրապարակված զեկույցում։

«2025 թվականին բնակչության բնական աճը Երկրորդ համաշխարհային պատերազմի ավարտից ի վեր առաջին անգամ կազմել է բացասական թվեր։ Այն կազմել է մինուս 6 հազար մարդ»,- ասված է փաստաթղթում։

Անցյալ տարի Ֆրանսիայում ծնվել է 645 հազար երեխա, ինչը ամենացածր ցուցանիշն է 1942 թվականից ի վեր։ Մահացել է 651 հազար մարդ, այսինքն՝ 1,5%-ով ավելի, քան նախորդ տարի։ Մահացության նման աճը պայմանավորված է 2025 թվականի ձմռան գրիպի համաճարակով և ամռան ուժեղ շոգի դրվագներով, հայտնում է Insee-ն։

Դրան զուգահեռ, հերթական հակառեկորդն է սահմանել նաև ծնելիության գումարային գործակիցը։ 2025 թվականին Ֆրանսիայում մեկ կնոջ հաշվով բաժին է ընկել 1,56 երեխա, ինչը ամենացածր ցուցանիշն է Առաջին համաշխարհային պատերազմի ավարտից ի վեր։

Միևնույն ժամանակ, կյանքի տևողությունը երկրում աճել է և կազմել 85,9 տարի կանանց և 80,3 տարի տղամարդկանց համար։

Ֆրանսիայի ընդհանուր բնակչությունը 2026 թվականի հունվարի 1-ի դրությամբ կազմել է 69.1 միլիոն, որից 22%-ը 65 տարեկան և բարձր մարդիկ են։