Չինաստանը կոչ է անում ԱՄՆ-ին չեղարկել առևտրային գործընկերների նկատմամբ կիրառվող միակողմանի մաքսատուրքերը. Պեկինը մտադիր է հաստատակամորեն պաշտպանել իր շահերը: Այս մասին ասված է ՉԺՀ առևտրի նախարարության կայքում հրապարակված հաղորդագրության մեջ:

«Մենք ուշադրություն ենք դարձրել սակագների վերաբերյալ գործով ԱՄՆ Գերագույն դատարանի որոշմանը և ներկայումս իրականացնում ենք այդ որոշման բովանդակության ու հետևանքների համապարփակ գնահատում: Չինական կողմը հետևողականորեն դեմ է հանդես գալիս ցանկացած միակողմանի մաքսատուրքի և բազմիցս ընդգծել է, որ առևտրային պատերազմում հաղթողներ չկան, իսկ հովանավորչությունը ապագա չունի: ԱՄՆ-ի պատասխան մաքսատուրքերը, ֆենտանիլի նկատմամբ սահմանված տուրքերը և այլ միակողմանի միջոցները խախտում են միջազգային առևտրային կանոններն ու ԱՄՆ ներքին օրենսդրությունը, ինչպես նաև չեն համապատասխանում բոլոր կողմերի շահերին», - նշել են գերատեսչությունում:

ՉԺՀ առևտրի նախարարությունում նաև նշել են, որ Չինաստանի և ԱՄՆ-ի հարաբերություններում օգուտը ձեռք է բերվում համագործակցության միջոցով, իսկ առճակատումը վնաս է հասցնում: «Չինական կողմը հորդորում է ԱՄՆ-ին չեղարկել առևտրային գործընկերների նկատմամբ սահմանված միակողմանի մաքսատուրքերը: Մենք նաև ուշադրություն ենք դարձրել այն փաստին, որ ԱՄՆ-ը պատրաստվում է ձեռնարկել այլընտրանքային միջոցներ, այդ թվում՝ առևտրային հետաքննություններ, որպեսզի պահպանի իր առևտրային գործընկերների նկատմամբ կիրառվող հավելյալ մաքսատուրքերը: Չինաստանը ուշադիր հետևելու է իրավիճակին և հաստատակամորեն պաշտպանելու է իր շահերը», - ասված է հայտարարության մեջ:

Ավելի վաղ ԱՄՆ Գերագույն դատարանը լիազորությունների չարաշահում է ճանաչել ամերիկյան վարչակազմի կողմից այլ երկրների դեմ ներմուծման մաքսատուրքերի սահմանումը՝ միջազգային արտակարգ իրավիճակների դեպքում տնտեսական լիազորությունների մասին օրենքի (IEEPA) պատրվակով: Միևնույն ժամանակ, բարձրագույն դատական ատյանը չի հստակեցրել, թե արդյոք ԱՄՆ-ն պարտավոր է վերադարձնել նախկինում որպես մաքսատուրք վճարված միջոցները: Փետրվարի 21-ին Վաշինգտոնի վարչակազմը հայտարարել է ԱՄՆ ներմուծման այսպես կոչված գլոբալ մաքսատուրքերը 10%-ից մինչև 15% բարձրացնելու մասին: