նախընտրելի դարձնել
Անցյալ տարի բանտի վրա Իսրայելի իրականացված օդային հարվածը ռազմական հանցագործություն է՝ հայտարարել է Իրանի հարցով անկախ միջազգային փաստահավաք առաքելության նախագահ Սառա Հոսեյնին՝ միաժամանակ նախազգուշացնելով ԱՄՆ-ի և Իսրայելի շարունակվող ռմբակոծությունների ֆոնին հետագա հաշվեհարդարների վտանգի մասին։
Իրանական իշխանությունների տվյալներով՝ անցյալ տարվա հունիսին Թեհրանի Էվին բանտի վրա կատարված հարվածի հետևանքով զոհվել է ավելի քան 70 մարդ։ Բանտը նաև վնասվել է ԱՄՆ-ի և Իսրայելի վերջին հարվածների ժամանակ, ինչը մտահոգություններ է առաջացրել բանտարկյալների, նրանց թվում՝ բրիտանացի զույգի անվտանգության վերաբերյալ։
«Մենք բավարար հիմքեր ունենք կարծելու, որ Իսրայելը ռազմական հանցագործություն է կատարել՝ Էվին բանտի վրա իր օդային հարվածներով կանխամտածված կերպով հարձակվելով քաղաքացիական թիրախի վրա»,- նշել է Հոսեյնը։
Ըստ նրա՝ զոհվել է 80 մարդ, որոնց թվում՝ մեկ երեխա և ութ կին։ Հոսեյնի վերջին զեկույցը, որը հիմնված է զոհերի և վկաների հետ հարցազրույցների, արբանյակային լուսանկարների և այլ փաստաթղթերի վրա, ներկայացվել է Խորհրդին երկուշաբթի օրը։
Իսրայելը չի մասնակցել քննարկմանը և լքել է Խորհրդի նիստը՝ իր տեղը դատարկ թողնելով։
Հոսեյնը դատապարտել է Իրանում քաղաքացիական բնակչության շրջանում զոհերի աճը և մտահոգություն հայտնել, որ ներկայիս ռմբակոծությունների արշավը կարող է հանգեցնել այլախոհների նկատմամբ ավելի կոշտ ճնշման: «Մեր հետաքննությունների հիմնական եզրակացությունը հստակ է. արտաքին ռազմական գործողությունները չեն ապահովում պատասխանատվություն կամ չեն հանգեցնում նշանակալի փոփոխությունների: Ընդհակառակը, դրանք կարող են ուժեղացնել ներքին ճնշումները»,- նշել է նա։
ՄԱԿ-ի՝ Իրանի հարցերով մարդու իրավունքների փորձագետ Մայ Սատոն ևս մտահոգություն է հայտնել բանտարկյալների ճակատագրի վերաբերյալ, դրանց թվում՝ հունվարին զանգվածային բողոքի ցույցերի ժամանակ ձերբակալվածների: Ընտանիքները չեն կարողանում կապ հաստատել իրենց հարազատների հետ, իսկ բանտերում սննդի և դեղորայքի պաշարները նվազում են, նշել է նա։
Իրանի դեսպան Ալի Բահրեյնին կոչ է արել դատապարտել ԱՄՆ-ի և Իսրայելի հարվածները, որոնք, ըստ նրա, երկրում ավելի քան 1300 մարդու կյանք են խլել:
