Հայաստանում հոկտեմբերի 15-21-ը V անգամ մեկնարկում են Ռուսական խոսքի օրերը:
Ինչպես NEWS.am-ին հայտնեցին Հայաստանում «Ռոսսոտրուդնիչեստվո»-ի մամուլի ծառայության ներկայացուցչությունում, Օրերն անցկացվում են Հայ-ռուսական բարեկամության եւ համագործակցության ընկերության, «Հայաստան-Ռուսաստան» ընկերության, ռուսաց լեզվի ուսուցիչների հայկական ասոցիացիայի, Հայ-ռուսական բարեգործական հիմնադրամի, Ռուսական բուհերի շրջանավարտների հայկական կազմակերպության համագործակցությամբ` «Ռոսսոտրուդնիչեստվո»-ի, Կրթության, գիտության եւ մշակույթի նախարարությունների, Ռուսաստանի եւ Հայաստանի Գրողների եւ լրագրողների միությունների հովանու ներքո:
Հայաստանում Ռուսական խոսքի օրերը հանդիսավորությամբ կբացվեն հոկտեմբերի 16-ին, ժամը 19.00-ին` Վյաչեսլավ Սպեսիվցեւի ղեկավարության ներքո գտնվող Մոսկվայի երիտասարդական փորձարարական թատրոնի ներկայացմամբ:
Հոկտեմբերի 18-ին Ա. Ս. Գրիբոյեդովի «Խելքից պատուհաս» պիեսի բեմադրության 185-ամյակի առթիվ Երիտասարդական թատրոնը կցուցադրի նույնանուն ներկայացում:
Հոկտեմբերի 21-ին եզրափակչին կներկայացվի Ֆոնվիզինի «Տհասը» պիեսի հիման վրա «Չեմ ուզում ամուսնանալ» ներկայացումը: Նշենք, որ Երիտասարդական թատրոնի ներկայացումները կցուցադրվեն նաեւ Գյումրի, Վանաձոր եւ Սպիտակ քաղաքներում: Օրերը կանցնեն որոշակի թեմատիկայով.
Հոկտեմբերի 15. «Ռուսաստան-Հայաստան, գործընկերներ, համախոհներ, ընկերներ»` նվիրված է Հայաստանի եւ Ռուսաստանի դիվանագիտական հարաբերությունների 20-ամյակին եւ ՌԴ-ի ու ՀՀ-ի միջեւ բարեկամության ու համագործակցության և փոխադարձ օգնության մասին պայմանագրի ստորագրման 15-ամյակին:
Հոկտեմբերի 16. «Մենք հավատարիմ ենք մեր հիշողությանը». Կխոսվի Բորոդինոյի ճակատամարտի 200-ամյակի եւ Օշականի ճակատամարտի 185-ամյակի մասին:
Հոկտեմբերի 17. «Հայկական եւ ռուսական գիտությունների օր»` նվիրված Օրբելի եղբայրներին: Ռուսական եւ խորհրդային արեւելագետ, հասարակական գործիչ, ԽՍՀՄ Գիտությունների ազգային ակադեմիայի ակադեմիկոս, ՀՍՍՀ-ի Գիտությունների ազգային ակադեմիայի առաջին տնօրեն, Էրմիտաժի տնօրեն Հ. Ա. Օրբելու եւ ԽՍՀՄ Գիտությունների ազգային ակադեմիայի փոխնախագահ Լ. Ա. Օրբելու 125-ամյակին:
Հոկտեմբերի 18. «Ռուսական գիրքը Երեւանում` Գրքի համաշխարհային մայրաքաղաք 2012-ում»: Օրը նվիրված կլինի ռուսական դասական եւ ժամանակակից գրականությանը:
Հոկտեմբերի 19. «Ռուսաց եւ հայոց գեղարվեստական լեզուների օր». Օրը նվիրված կլինի ռուս եւ հայ ժամանակակից գրականության լեզուների հիմնադիրներ Ալեքսանդր Պուշկինին եւ Խաչատուր Աբովյանին:
Ռուսական խոսքի օրերի շրջանակում Հայաստան կժամանի Մոսկվայի պետական լեզվաբանական համալսարանի պատվիրակությունը: Տեղի կունենան սեմինարներ եւ վարպետության դասեր: Տեղի կունենան նաեւ բաց դասեր Հայաստանի դպրոցներում եւ բուհերում:
Այդ ամբողջ ընթացքում կաշխատի մանկավարժական գրականության ցուցահանդես, որի օրինակները մոսկվացիները կհանձնեն բուհերի գրադարաններին եւ ամբիոններին:
