«Բաշնեֆտ» ընկերության բաժնետոմսերը յուրացնելու եւ անօրինական ճանապարհով ստացված գումարները լվանալու մեջ մեղադրվող՝ տնային կալանքի տակ գտնվող հայ գործարար Լեւոն Հայրապետյանն Ամանորը դիմավորել է տանը` դուստրերի եւ թոռնիկների հետ: Այս մասին NEWS.am-ի թղթակցի հետ զրույցում ասաց նրա մտերիմ ընկեր Արթուր Սաֆարյանը:
Նրա խոսքով` Լեւոն Հայրապետյանը տոներից հետո ամենայն հավանականությամբ նորից կտեղափոխվի հիվանդանոց` բուժումը շարունակելու նպատակով:
«Վիճակը բավարար է, բայց շուտով նորից հիվանդանոց կտեղափոխվի»,- ասաց Արթուր Սաֆարյանը:
Նշենք, որ տոներից առաջ Հայրապետյանը գտնվում էր հիվանդանոցում: Նա դուրս էր գրվել` Ամանորը տանն անցկացնելու համար: Հիշեցնենք, որ նա տառապում է քաղցկեղով, ունի շաքարային դիաբետ եւ արյան բարձր ճնշում:
Հիշեցնենք, որ հուլիսի 24-ին Ռուսաստանի Դաշնության Քննչական կոմիտեն հայ գործարար Լեւոն Հայրապետյանին մեղադրանք է առաջադրել ՌԴ քրեական օրենսգրքի 160-րդ (յուրացում կամ վատնում) եւ 174-րդ (անօրինական ճանապարհով ձեռք բերված միջոցների լվացում) հոդվածներով: Սեպտեմբերի 12-ին Լեւոն Հայրապետյանին եւս մեկ մեղադրանք է առաջադրվել մեքենայության հոդվածով: Հոկտեմբերի 3-ին Մոսկվայի Բասմանի դատարանը փոխել է «Բաշնեֆտի» գործի ֆիգուրանտ, հայտնի հայ գործարար Լեւոն Հայրապետյանի խափանման միջոցը՝ կալանավորումը փոխարինելով տնային կալանքով: Դեկտեմբերին դատարանը եւս 4 ամսով երկարացրել է Հայրապետյանի կալանքի ժամկետը:
