Գյումրիում ապրիլի 18-ին տեղի ունեցած սպանության դեպքի վայրի՝ Մհեր Մկրտչյան 34Ա շենքի շքամուտքի երկրորդ հարկի աստիճաններին առկա են արյան հետքեր: Ոստիկանությունից NEWS.am-ի թղթակցի հարցին, թե արդյոք արյան հետքերը պատկանում են հանցագործին, ոչ հաստատեցին, ոչ էլ հերքեցին:
ՀՀ քննչական կոմիտեի նախագահի խորհրդական Սոնա Տռուզյանը NEWS.am-ի թղթակցի հետ զրույցում նշեց որ դեպքի առթիվ հարուցվել է քրեական գործ, քրեական օրենսգրքի 175 եւ 104 հոդվածների (ավազակային հարձակում եւ սպանություն) հատկանիշներով:
Նրա խոսքով՝ ելնելով գործի գաղտնիությունից այլ մանրամասներ ենթակա չեն հրապարակման:
«Դեռ քննչական գործողություններ են կատարվում, կասկածյալին (ներին) հայտնաբերելու, համար այլ մանրամասներ հաղորդել չեմ կարող»,-ասաց Սոնա Տռուզյանը:
Շենքի բանկում կայանված «Մերսեդես E 260» մակնիշի ավտոմեքենան, որն ըստ նախնական տվյալների առնչություն ունի մոր եւ դստեր սպանության հետ, կեսգիշերին ոստիկանության աշխատակիցները տեղափոխել են Ախուրյանի ոստիկանության հատուկ պահպանվող վայր:
Սպանվածների մարմինները լուսադեմին նոր տեղափոխել են Գյումրիի պաթոլոգոանատոմիական լաբորատորիա: Շահումյանների բնակարանի դուռը կնիքված է եւ հատուկ հսկողություն է սահմանված ոստիկանության կողմից:
Ավելի վաղ NEWS.am-ը հայտնել էր, որ Գյումրիում սպանություն է տեղի ունեցել: Ըստ նախնական տեղեկությունների, Մհեր Մկրտչյան 34Ա շենքի բնակարաններից մեկում հայտնաբերել են մորն ու աղջկան՝ դանակահարված վիճակում: Թաղամասում տարածված տեղեկությունների համաձայն` տունը տակնուվրա արված է եղել, ենթադրվում է, որ ավազակային հարձակում է եղել: Շիրակի մարզի դատախազ Րաֆֆի Ասլանյանը մեզ հետ զրույցում ասել էր, որ սպանված հայտնաբերված մոր եւ դստեր վրա դանակի բազմաթիվ հարվածների հետքեր կան:
