Ամերիկացի զինվորականները հարված են հասցրել Կարիբյան ծովում գտնվող մի նավի, որն, ըստ նրանց վարկածի, օգտագործվում էր թմրանյութերի տեղափոխման համար։ Սեպտեմբերի 19-ի հարձակման հետևանքով զոհվել է չորս մարդ, հայտնում է ԱՄՆ Հարավային հրամանատարությունը (SOUTHCOM)։

Ամերիկացի զինվորականների տվյալներով, նավը շարժվում էր թմրանյութերի ապօրինի առևտրի հայտնի երթուղիներից մեկով։ SOUTHCOM-ը հայտարարել է, որ գործողությունն իրականացվել է Արևմտյան կիսագնդի միացյալ օպերատիվ խմբի ուժերով՝ Դոնալդ Թրամփի վարչակազմի կողմից թմրանյութերի ապօրինի առևտրի հետ կապված խմբավորումների դեմ շարունակվող արշավի շրջանակում։

X սոցիալական ցանցում հրապարակված տեսագրության մեջ երևում է շարժվող նավը, որից հետո տեղի է ունենում բռնկում։

Վերջին հարձակումը հաշվի առնելով՝ այն մարդկանց թիվը, որոնք զոհվել են ամերիկացի զինվորականների հարվածների հետևանքով այն նավերի դեմ, որոնք Վաշինգտոնը կապում է թմրանյութերի ապօրինի շրջանառության հետ, հասել է առնվազն 231-ի։

Ընդհանուր առմամբ, ըստ Associated Press-ի, այս արշավի սկզբից ի վեր Կարիբյան ծովում և Խաղաղ օվկիանոսի արևելյան հատվածում հասցվել է 69 հարված։

Թրամփի վարչակազմը պնդում է, որ լատինաամերիկյան թմրակարտելների հետ դիմակայությունը դիտարկում է որպես զինված հակամարտություն և հարվածներն արդարացնում է ԱՄՆ թմրանյութերի ներհոսքը կանգնեցնելու անհրաժեշտությամբ։ Միևնույն ժամանակ Վաշինգտոնը նաև ընդլայնում է ռազմական համագործակցությունը տարածաշրջանի երկրների հետ՝ հանցավոր խմբավորումների դեմ գործողություններ իրականացնելու համար։

Այսպես, ԱՄՆ պաշտպանության նախարար Փիթ Հեգսեթը հայտարարել էր Կոլումբիայի և Հոնդուրասի, ինչպես նաև տարածաշրջանի այլ երկրների հետ ձեռք բերված պայմանավորվածությունների մասին։

Սակայն Գվատեմալայում հերքել էին նման պայմանավորվածության ձեռքբերումը։ Էկվադորը մարտ ամսից ԱՄՆ-ի հետ համատեղ գործողություններ է իրականացնում հանցավոր խմբավորումների դեմ։