Վենետիկի հանձնաժողովը, որը Եվրոպայի խորհրդի խորհրդատվական մարմին եւ կազմված է սահմանադրական իրավունքի անկախ փորձագետներից, հրապարակել է իր գնահատականը Հայաստանում նոր սահմանադրության փոփոխությունների 1-7 գլուխների վերաբերյալ:
Փորձագետներն իրենց եզրակացությունում ողջունում են սահմանադրական բարեփոխումների հանձնաժողովի աշխատանքը՝ նշելով, որ «Վենետիկի հանձնաժողովի հետ բաց երկխոսության» արդյունքում կարեւոր փոփոխություններ են կատարվել բարեփոխումների տեսքստում:
Միաժամանակ, Վենետիկի հանձնաժողովի փորձագետները առաջարկում են փոփոխել որոշ դրույթներ, մասնավորապես, պետք է հանվեն քվեարկելու և Ազգային ժողովի թեկնածու լինելու սահմանափակումները:
Բացի այդ, փորձագետներն առաջարկում են հանել առավել մեծ թվով ձայներ հավաքած կուսակցությունների եւ կուսակցությունների դաշինքների միջեւ ընտրությունների երկրորդ փուլի մասին դրույթը:
Փորձագետները նշում են, որ անհրաժեշտ է հանել նաեւ խորհրդարանում նոր խմբակցությունների ձեւավորման արգելքի մասին դրույթը, քանի որ դա սահմանափակում է պատգամավորների մանդատի ազատությունը:
Ինչ վերաբերում է դատական իշխանությանը, ապա քաղաքական մարմինները չպետք է որեւէ կերպ միջամտեն Վճռաբեկ դատարանում դատավորների հեռացման եւ նոր դատավորների ու դատարանների նախագահների նշանակման ընթացակարգին:
Ամփոփելով, Վենետիկի հանձնաժողովը կոչ է անում ՀՀ իշխանություններին շարունակել երկխոսությունը բոլոր քաղաքական ուժերի եւ քաղաքացիական հասարակության հետ եւ լայն աջակցություն ապահովել բարեփոխումների համար:
«Վենետիկի հանձնաժողովն ուրախ է շարունակել համագործակցությունը ՀՀ իշխանությունների հետ այդ կարեւոր բարեփոխումների հարցում»,-ասված է փաստաթղթում:
Նշենք, որ սահմանադրության նախագծի 89/4 հոդվածում մասնավորապես, ասվում է. «Եթե Ազգային ժողովի ընտրությունների առաջին փուլի արդյունքում կայուն խորհրդարանական մեծամասնություն չի ձևավորվում, ապա անցկացվում է քվեարկության երկորդ փուլ, որին մասնակցում են առավելագույն ձայներ ստացած երկու կուսակցությունները կամ կուսակցությունների դաշինքները»:
