Ազգային ժողովում քիչ առաջ ավարտվել է Ընտրական օրենսգրքի նախագծի փակ քննարկումը, որին ՀԱԿ-ից մասնակցել է Գագիկ Ջհանգիրյանը։ Նշենք, որ Ջհանգիրյանի առաջարկն էր լիագումար նիստից բացի շարունակել քննարկումները եւ կատարել շտկումներ։
«Կարծում եմ՝ այս քննարկումները օգտակար են, քանի որ այն ոչ միայն քաղաքական փաստաթուղթ է, այլեւ իրավական, եւ բազմաթիվ հարցեր կան, որոնք պետք է քննարկվեն»,-NEWS.am-ի հետ զրույցում ասաց ԱԺ պետաիրավական հանձնաժողովի ղեկավար Հովհաննես Սահակյանը։
Նա վստահեցրեց, որ երկրորդ ընթերցմանն արդեն նախագիծը կներկայացվի փոփոխված, սակայն խուսափեց փակագծերը բացել։
«Մենք գլուխ առ գլուխ անցնում ենք եւ հիմա կանխավ որեւէ բան չասեմ, երկրորդ ընթերցման պարագայում կերեւա, թե ինչ փոփոխություններ են տեղի ունեցել։ Նույն լիագումար նիստերի դահլիճում, երբ որ քննարկումներ էին լինում, զուգահեռ շարունակվում էր քննարկումը նաեւ աշխատասենյակում եւ այդ ժամանակ ռեգիոնալ կուսակցություների գաղափարը դուրս մնաց, նման օրինակներ էլի կլինեն»,-ասաց պատգամավորը։
Նշենք, որ Ընտրական օրենսգրքի աշխատանքային քննարկումները կշարունակվեն վաղը, ժամը 18։00-ին։
