նախընտրելի դարձնել
TRIPP նախագծի իրականացման մասին համաձայնագիրը վերաբերում է բացառապես Հայաստանի տարածքին և չի ենթադրում դրանով նախատեսված մեխանիզմների տարածում Ադրբեջանի, Թուրքիայի կամ այլ երկրների վրա։ Այս մասին նոյեմբերի 2-ին Ազգային ժողովում ավանդական ճեպազրույցների ժամանակ հայտարարել է իշխող «Քաղաքացիական պայմանագիր» խմբակցության պատգամավոր Արթուր Հովհաննիսյանը։
Նրա խոսքով՝ TRIPP-ը Հայաստանի և ԱՄՆ-ի միջև ստորագրված համաձայնագիր է, և Ադրբեջանի տարածքում համապատասխան նախագիծ չկա։ Հետևաբար հնարավոր չէ ակնկալել, որ փաստաթղթով նախատեսված մեխանիզմները կգործեն նաև Ադրբեջանում։
Հովհաննիսյանն ընդգծել է, որ TRIPP-ի հարցը պետք է տարանջատել Հայաստանի և Ադրբեջանի միջև հարաբերությունների կարգավորման գործընթացից։ Մասնավորապես, երկու երկրների միջև պայմանների և կարգավորումների հայելայնության պահանջը, նրա խոսքով, մնում է ուժի մեջ և որևէ կերպ կապված չէ TRIPP-ի մասին համաձայնագրի հետ։
Որպես օրինակ պատգամավորը բերել է բեռնափոխադրումները․ նրա պնդմամբ՝ բեռներն արդեն վաղուց անխոչընդոտ տեղափոխվում են Ադրբեջանի տարածքով թե՛ դեպի Հայաստան, թե՛ Հայաստանից։
«Խնդրում եմ՝ Հայաստանի և ԱՄՆ-ի միջև ստորագրված փաստաթղթերին վերաբերող TRIPP-ի համաձայնագիրը չխառնել Հայաստանի և Ադրբեջանի միջև ստորագրված փաստաթղթերի հետ, որոնցում ԱՄՆ-ը հանդես է գալիս որպես վկա», - հորդորել է Արթուր Հովհաննիսյանը։
Նա նաև նշել է, որ TRIPP-ի մասին համաձայնագիրն արդեն վավերացվել է և գործելու է այդ փաստաթղթի դրույթներին համապատասխան ձևով։ Իսկ Հայաստանի և Ադրբեջանի միջև նախաստորագրված խաղաղության համաձայնագիրը, ինչպես նաև դիվանագիտական հարաբերությունների հաստատման մասին փաստաթուղթը ուժի մեջ մտնելուց հետո նույնպես կիրագործվեն դրանցում ամրագրված պայմաններին համապատասխան ձևով։
